TURA: West Garo Hills a·jani a·kawe jolrango donggipa ita karkanarango itani damko nangana bate palengani a·sel manderang aro mongsongbate PMAY-G scheme-ni nokrangko rikna chol man·paenggipa manderang neng·nikanirangko chagrongna nangtokenga ine All Meghalaya Minorities Students Union (AMMSU), West Garo Hills a·jani Deputy Commissioner-na badi ka·doangaha.
Iani bidingo West Garo Hills a·jani Deputy Commissioner-na seachi badi ka·doatengon, PMAY-G scheme-ni nokrangko rikna on·gipa tangka paisarangara gong 1,30,000-san ong·aia indiba Gorband aro uni wilwilao donggipa ita karkanarango itako ge hajalprakon gong 11,000-oni gong 12,000-mang ong·pile palskaengani a·sel ia scheme-ni nokrangko rikna chol man·paenggipa manderang, an·tangtangna on·gimin tangka paisarangchi nokrangko matchote rikna man·jaenga ine AMMSU-ni president parakataha.
“Itako ge hajalprako gong 11,000-oni gong 12,000-mang ong·pile palaniara bazaar antirango dongimin damnan batpilenga aro iani a·selan PMAY-G scheme-ni namgniko man·paenggipa manderang, an·tangtangna on·gipa tangka paisarangchi nokrangko matchote rikna man·tokjaenga,” ine AMMSU-ni president parakataha.
Gorband aro uni wilwilao donggipa ita karkanarango palenggipa itarangni gimin sandirokatenba, ia ita karkanarangna itani damrangko bazaar-ni rate-o tik ka·e on·china gitaba AMMSU, West Garo Hills a·jani Deputy Commissioner-ko didiataha.