SHILLONG: Re·baenggipa February 16 tarikoni a·bachengatenggipa Budget session-ni somoio, a·dokni dingtang dingtang nangchongmotgipa kamrangni bidingo apsan ku·rang on·na man·na gita a·dokni opposition dolskarang, chong·motan Trinamool Congress (TMC) aro Voice of the People’s Party (VPP)-ko a·dokni Congress dol ku·mongataha.
Iani bidingo talataniko on·angengon, Budget session-ni somoio Opposition dolrang ong·e, a·dokni nanganirangna apsan ku·rang on·na gita ku·monge Congress dol, TMC aro VPP dolrangna seataha ine Opposition dolni dilgipa aro Congress Legislature Party (CLP)-ni dilgipa Ronnie V Lyngdoh parakataha.
“Iani bidingo chinga uamangna (TMC aro VPP)-na seataha indiba chinga uamangni aganchakanirangko man·sokujaenga,” ine ua aganaha.
Lyngdoh-ni parakatani gitade, Assembly-o opposition dolrang ong·e a·dokni nanganirangna, Congress, TMC aro VPP dolrang apsan ku·rang on·genchimode, sorkarini kosako bilakbate ku·rang on·na man·gen ine nikenba uamang, TMC aro VPP dolrangko ku·monge seataha.
Da·o dipet Congress dolo MLA sak 5, TMC-o sak 5 aro VPP-o sak 4 ong·e Opposition dolo membor-rang gimik sak 14 ong·engachim ine nikna man·a.
Assembly-o Opposition dolrang meligrikna man·jaenga ine agananiko jegalatengon, Opposition dolo ong·enggipa political dolgittaman dingtang dingtang bimangrangsa ong·a ine Opposition dolni dilgipa parakataha.
“Chinga meligrikna man·ja ine darangba aganna man·jawa maina chinga dolgittaman dingtang dingtang bimangrangsa ong·a. Da·o dipet chinga apsan kamrangko ka·rimkujanasan iako aganna man·aigen. Uni gimin chinga da·o uamangni aganchakanina sengkuenga,” ine Lyngdoh aganaha.
“A·dokni nanganirangna apsan ku·rang on·na man·na gita chinga apsan asonge agangrikna man·genchimode anga kusi ong·batgen. Assembly-ni budget session-o chinga apsan a·dokni nangchongmotgipa kamrangni gimin ku·rang on·genchimode uan a·dokna namgni ong·gen,” ineba Lyngdoh aganaha.
Indake ong·genchimoba ian uni okamaniko opposition dolskarang, chong·motan TMC aro VPP dolrang ra·chakgenchimosa chu·sokgipa ong·aigen ine Congress dolni dilgipa aganskaaha.