TURA: West Garo Hills a·jani Tikrikilla jolo donggipa dingtang dingtang songrango bijoliko on·gija, jaantian bijolini bill-rangkode man·sotokenga ine dingtang dingtang dolrang, a·dokni Chief Minister Conrad K Sangma-na badi ka·doataha.
Tikrikilla jolo donggipa AAPE, Civil Society A·chik Welfare Organisation (CSAWO) aro Constitutional Rights Forum (CRF) dolrangni badi ka·doangani gitade, ia songrango batanggimin bilsibrina skangan metre box-rangkode chatahachim indiba bijolikode da·onan on·gija bill-rangko jaantian watatskaengachim.
Bijoli gri bill sokenggipa songrangara, Tikrikilla Block-ni ning·o donggipa Dabongjora, Dabanggre, Bolsaldamgre, Daigre aro Diganpara (Mewalkam) songrang ong·a ineba NGO-rang badi ka·doangaha.
Dabangjora songo je bijoli man·pagipa nokdangrangnaba bill-rangko nangana bate sokatenga ine janapatengon, Dabanggre songoba bill-rangko bilsi gimiknikosa ra·engani a·sel, lakni lak kajinarangko gamna nange songni manderang neng·nikanirangko chagrongna nangtokenga ine NGO-rang parakataha.
Indake ong·genchimoba, Bolsaldamgre, Daigre aro Dinganpara songrangode bilsibrina skangan metre box-rangko chate on·ahaoba da·onan bijoliko on·kujaenga indiba bill-rangko jaantian sokatenga ine NGO-rang matnangataha.
Ia songrango bijoliko man·kujaengani a·selan chatro chatrirang, poraianirango neng·nikanirangko chagrongna nangtokenga ine janapatskaengon, ia songrangna ta·raken bijoliko on·china gita sorkariko didiataha.
Iani bidingo NGO-rang, Tura-ni MP Agatha K Sangma, Power Minister A T Mondal, Tikrikilla MLA Jimmy D Sangma, Raksamgre MLA Limison D Sangma, West Garo Hills-ni Deputy commissioner aro department-ni gipin official-rangnaba sedoataha.