SHILLONG: Re·anggipa bilsini November jao, Byndihati-o donggipa Don Bosco College sambao, bikotdaldal koelarangko committee-ni nikani ja·man, iani bidingo sandirokaniko ta·rake matchotatchina Meghalaya High Court-ni songe on·gipa Single member Committee ku·pattianiko on·angaha.
BP Katakey-chi dilenggipa committee-ni Meghalaya High Court-na on·gipa interim report-o parakatani gitade, Byndihati-ni Don Bosco College janggilchipak aro sambao koelarangko nikaha ine 2023 bilsini December 15 tariko, East Jaintia Hills a·jani Additional Deputy Commissioner (ADC), Deputy Commissioner-na report-ko on·ahachim.
Uni report-o ADC-ni parakani gitade, ia koelarangara bikotdaldal gitasa nikachim aro ia koelani nokgiparangko ma·sikujaengani gimin ia koelarangko rim·e Khliehriat police station-o mokordama ka·aha ine Katakey-ni report-o janapataha.
Ia biapo nikgipa koelarangara komibeoba metric ton 8697.392 ong·achim ineba report-o parakaha.
Iani bidingo East Jaintia Hills a·jani SP, ia 2024 bilsini January 4 tariko, Assistant General of Police (A)-na u·iatenba, ia matchotkugijagipa case-ni bidingo sandirokanirangko dakengkua ine u·iatahachim.
Sandirokani bak gita rim·e ra·anggipa koelarangni mitamko Meghalaya a·dokni Forensic Science Laboratory-ona porikka ra·e nina watataha indiba da·o dipet iani result-rangko man·kujaengachim.
Indake ong·engon, ia koelarangko bikotanio jak donggipa manderangko niamo pangchake sastirangko on·na man·na gita iani bidingo sandirokaniko ta·raken matchotatna gita Katakey Committee, East Jaintia Hills a·jani SP-na ge·etaniko on·china ku·pattianiko on·ataha.