SHILLONG: Cancer sagiparangna nambate nirok sandiani cholrangko sandina gita Sombar salo a·dok sorkari, Apollo Telemedicine Networking Foundation (ATNF) baksa nangrime, Meghalaya Cancer Conclave-ko Shillong-o a·bachengataha.
Ia tom·aniko a·dokni Health Minister Ampareen Lyngdoh dilangaha aro tom·anio dingtang dingtang medical officer-ramg, chatro chatrirang, skigiparang, NGO-rang aro gipinrangba bak ra·angtokaha.
Ia tom·anio Health & Family Welfare department-ni Principal Secretary Sampath Kumar, jinmana aganprakengon, Cancer sagiparangna nambate sanna bananirangko aro simsak nirokanirangko on·na nangengani gimin aganangaha.
“Meghalaya a·doko cancer sagiparangna nambatgipa sanna bananirangko on·anian an·ching sakantini nangnikani ong·a aro ia tom·bimonganiko ong·atanian iana ja·ku de·chakatani ong·enga,” ine Kumar aganaha.
Ia tom·anio, Apollo Telemedicine Networking Foundation-ni Chief Business Officer Prem Anand-ba jinmana aganprakengon, ia kamo sorkari baksa bakrimaniko on·na man·engani gimin an·tangni kusi ong·aniko parakataha.
2023 bilsio a·dokni Chief Minister Conrad K Sangma-ni a·bachengatgipa ‘Meg Can Care’ project-o pangchake ia Meghalaya Cancer Conclave 2024-ko ong·atenga.