TURA: Samanda-oni Asanang-ona rama jal·langrangko tarianirang namjaenga ine A·chik Organisation for Social Welfare (AOSW) matnangatenba, kamrangko nambate nirokatchina gita PWD(R) Williamnagar Division-ni Executive Engineer-na sedoataha.
AOSW-ni president Griping B Marak-ni parakatani gitade, ia rama jal·langrangko MIDS company jako ra·e tariengachim indiba rama jal·langrangko tarianio ia company, PWD-ni dongimin niamrang gita tarijaengachim.
“Samanda-oni Asanang-ona tarianggipa ramao dolongrang namen apchonbeani a·sel gari bolgni re·grikna namen neng·ani ong·enga, uni gimin ia dolongrang gita gari bolgni re·grikna man·na gita dolongrangko apalbatatna nangenga,” ine Marak, PWD-ni executive engineer-ko didiataha.
Ia ramao culvert-rangkoba gital tarigija aro apalbatatgija gitcham culvert-rangkosa taridapaengani gimin ia culvert-rang, adita bilsirangni gisepon be·gruani cholrang dongaia ineba AOSW-ni president, mikrakataniko on·angaha.
“Ia ramani paktangtangon side wall aro retaining wall-rang dongjani gimin da·o wachini somoirangode a·arang be·wakbae, ia rama gita re·ruraenggiparangnasan ong·aigija ia ramani samba jolrango songdongenggipa manderangna kenchakna nangani ong·enga,” ine Marak parakataha.
Ia jolrango songdongenggipa manderangna maming kenchakna nanganirang dongjana gita aro ia rama gita re·ruraenggipa manderangna neng·nikanirang dongjana gita ia rama tarianiko nambate nirokatchina gitaba AOSW-ni president, PWD-ni executive engineer-ko didiataha.
Samanda-oni Asanang-ona rama jal·lang tarianirang namja ine AOSW badi ka·a
Date:
Share post: