SHILLONG: Tura Tech Park-na gong kror 126.94 tangkarangko Development of North Eastern Region (DoNER) Union Ministry chamataha.
Ia tangkarangko February-ni 8 tariko ma·mong sorkari, Prime Minister’s Development Initiative for North East Region (PM-DevINE) scheme-ni ning·o chamataha.
Chief Minister Conrad K Sangma-ni social media-o parakatani gitade, ia gong kror 126.94-oni gong kror 77.70-kode civil/interior work-na, gong kror 4.59-kode rama tariani kamrangna, kror 5.29-kode chi tariani kamrangna, gong kror 3.18-kode ‘firefighting works’-na gong kror 17.30-kode electrical-ni kamna aro gong kror 6.91-kode Heating, Ventilation & Air Conditioning (HVAC)-ni kamrangna chamataha.
Iana skang, Meghalaya a·dokni bilsi 50 gapaniko maniani bak gita bilsisamangna skangsan Shillong Tech Park-koba kuliahachim aro da·o Tura Tech Park-koba sorkari kulina siengaha.
A·dok sorkarini parakatani gitade, Shillong Tech Park-ko kulianichi bilsisani gisepon ming 1500 direct aro ming 5000 indirect kamrangko, Meghalaya a·dokni IT professional-rangna on·na man·ahachim.
Tura Tech Park-ko kulianichi Garo Hills-oba IT professional-rang bang·en namgnirangko man·gen ine sorkari, ka·dongchakenganiko parakataha.