NGH-o RBSK-ni bilsi 10 gapaniko mania

RESUBELPARA: Mongolbar salo, North Garo Hills a·jani District Medical & Health Office-ni gita, Rashtriya Bal Swasthya Karyakram (RBSK)-ni bilsi 10 gapaniko Mendipathar-ni Multipurpose Cooperative Society Hall-o maniangaha.
Ia tom·anio, North Garo Hills a·jani Deputy Commissioner AK Singh, mongsonggipa sokgipa ong·e jinmana aganprakangengon, RBSK-ni bilsi 10 gapanio dingtang dingtang kamrangchi dangdike on·ahani gimin Health department aro dingtang dingtang dolrangkoba mittelpilangaha.
Meghalaya a·doko RBSK-ko ra·gatchengaoni bang·en an·seng baljokgipa bi·sarangko nikna man·ahani gimin ian RBSK-ni kamrango chu·sokaniko mesokani ong·aha ineba Deputy Commissioner aganaha.
Ia RBSK program-ara, atchidaldaloni bilsi 18-ona kingking bi·sarangna an·seng baljokaniko on·na ra·gatgipa program ong·achim aro Garo Hills-o RBSK-ko ra·gatchengaoni lak 4 bi·sarangko porikka ra·e, dingtang dingtang sanna bananirangko on·na man·aha.
Indake ong·engon, RBSK-ni awareness program-o bakko ra·enba, ia program-ni ning·o dongimin nisanrangko chu·sokatna gita krengchina ia tom·anio bak ra·gipa manderangko Singh didiangaha.
Ia tom·anio, RBSK-ni consultant Johnson Nongbet, RBSK-ni kamrangni gimin agan-talate on·angaha aro North Garo Hills a·jani DM&HO Dr S Boro, rimchaksoani kattarangko aganangskaenba, a·jao uni office-ni gita ka·enggipa kamrangni bidingo agan-talate on·angjolaha.