SHILLONG: Umiam dolongko taridapna gita bilsi 10 skangan MeECL, a·dok sorkarina proposal-ko on·ahachim ine Sombar salo, Congress Legislature Party (CLP) aro Leader of Opposition (LO) ba Opposition dolni dilgipa Ronnie V Lyngdoh parakataha.
“Ia dolongko taridapna bilsi 10 skangan proposal-ko on·ahani gimin ua somoion tarina nangahachim. Jeba ong·china da·o kamrangko jako ra·ahani gimin ian namaha,” ine Lyngdoh, Congress MLA-rang baksana MeECL aro PWD-ni official-rang baksa Umiam Dam-o ka·enggipa kamrangko nieani ja·man, kobor ra·timgiparangna aganaha.
Kamrangko jabrini gisepon matchotgen ine talataniko on·angengon, ia dolongko taridapengani a·sel gari gorarang jakgitele re·rurana man·tokjae manderang neng·nikanirangko chagrongna nangenga ine Lyngdoh, an·tangni suk ong·gijaniko parakataha.
Dam Safety Act-ni dongimin niam gitade, Umiam dam-ko national highway dake jakkalna man·jachim ine janapatengon, ia dolongko tangbangatna gari gorarangni re·ruraaniko dingtang rama gita watna PWD aro MeECL bakan cholrangko sandigen ine CLP-ni dilgipa, an·tangni ka·dongchakenganiko parakataha.
Ia dam-o maiba nosto ong·na nanggenchimode, ia dam-ni ka·majolrango songdongenggipa manderangni janggi aro gam-jinrangna kenchakna nangani ong·gen ineba Lyngdoh mikrakataniko on·angaha.
Ia dolongko taridapna gita gong kror 48 tangkarangko chamaniara ong·aiama ine sing·anina aganchakaniko on·angengon, ia project-ni dingtang dingtang bakrangba donga ine Lyngdoh talataniko on·angaha.
Indake ong·engon, ia dolong taridapani kamrangko uamang jabrini gisepo matchotatna ka·dongenga ine MeECL-ni Additional Chief Engineer Edward Syiemlieh parakatskaaha.
“Jagnide batangaha aro chinga da·o dingtang dingtang kolrangko aro kam ka·giparangko ra·badapenba, jabrini gisepon kamrangko matchotatna ka·dongenga,” ine ua aganaha.
Ia dolong tarianiko nieanio, Opposition dolni Chief Whip Saleng A Sangma, Congress MLA Celestine Lyngdoh, Gabriel Wahlang aro Charles Marngar-ba bak ra·angahachim.