WGH-o Tura Industrial Fair-ko a·bachengata

TURA: Mongolbar saloni a·bachenge salgittamna New Tura-o donggipa Matchakolgre LP School kal·chakramo ong·atenggipa Tura Industrial Fair 3.0-ko West Garo Hills a·jani Deputy Commissioner Jagdish Chelani a·bachengate on·angaha.
Ia District Level Industrial Exhibition-ko bilsiantian District Commerce & Industries Centre (DCIC), jolo bading chiwalgiparangko tang·doatna aro uamangni bosturangko pala sim·anio dakchakna gita ong·atrongengachim.
Ia Industrial Exhibition-ko a·bachengate on·angani somoio West Garo Hills a·jani Deputy Commissioner Jagdish Chelani, jinmana aganprakangengon, PM Vishwakarma Scheme-na West Garo Hills a·jaonin gimik sak 2300 manderangko biming segatna man·ahani gimin DCIC-ni official-rangko aro gipin staff-rangko mittelpilangaha.
Tura songjinmao da·osa economy tang·dobana a·bachengenga ine janapatengon, jolo donggipa karkanarangko aro bading chiwale cha·enggiparangko ra·dona gita bang·en kamrangko ka·na nangkuenga ine Chelani aganaha.
Ia tom·anio, West Garo Hills DCIC-ni General Manager DFR Marak-ba jinmana aganprakangengon, Annual District Level Industrial Exhibition-ko da·o Tura Industrial Fair ine mingsreskaenba, industry-rangko aro karkanarangko tang·doatna bilsiantian ong·atenga ine parakataha.
Ia Industrial Fair-ko ong·atanio, jolni sak 47 bading chiwalgiparang baksana dingtang dingtang department-rang, jekai Agriculture, Horticulture, Animal Husbandry & Veterinary, Sericulture & Weaving, Fishery, Community of Home Science aro uandakgipa department-rangba bakko ra·e ma·manti bosturangko mesokna aro palna sim·na gita donenga.
Ia salgittamna ong·atenggipa Tura Industrial Fair-o Meghalaya Grassroots Music Program (MGMP) aro Kids Zone-koba ong·atenga.