NGH-ni Wageasi songo Rural Haat-ko kulia

TURA: Budbar salo, North Garo Hills a·jani Kharkutta Block ning·o donggipa Wageasi songo Rural Haat-ko Shillong-o donggipa NABARD Regional Office-ni General Manager Dr Prabhudatta Sahoo-ni jakchi kulie on·angaha aro ia Rural Haat-ko kulie on·anio, Kharkutta Block-ni BDO Chekame Sangma aro DDM Dr K Sobita Devi-ba dongpae bak ra·angaha.
Ia Rural Haat-ko rikna gita National Bank for Agriculture and Rural Development (NABARD) tangka paisarangko dakchake on·aha aro ia Rural Haat-ko Bakdil NGO jako ra·e rikskaaha.
Ia Rural Haat-ko nokdonggae on·angani somoio NABARD Regional Office-ni General Manager Dr Prabhudatta Sahoo, jinmana aganprakangengon, ia Rural Haat-ko kulianichi Kharkutta Block-ni wilwilao game ge·e cha·enggipa pilak manderangan namgniko man·gnok ine parakataha.
Ia Rural Haat-ko NH-217 ramani sambao rikahani gimin ian game ge·e cha·enggipa manderangna, an·tangtangni game ge·e man·gipa bosturangko pala sim·anio bang·en namgnirangko man·gnok ineba ua aganaha.