TURA: Tura jillani samba jolo donggipa songrangna chirangko on·na man·na gita Sonibar salo, gong kror 100-ni Bulk Water Supply Project-na pangchakaniko a·dokni Chief Minister Conrad K Sangma, Ballonggre-o songe on·angaha aro ia pangchakaniko songe on·anio, Meghalaya Assembly-ni Speaker Thomas A Sangma, a·dokni PHE Minister Marcuise N Marak, Tura-ni MP Agatha K Sangma aro dingtang dingtang dilgiparangba dongpae bak ra·angtokaha.
Ia project-na tangka paisarangko, North East Special Infrastructure Development Scheme (NESIDS)-ni ning·o DoNER Ministry chame on·enga aro ia Bulk Water Supply project-ko matchotahaode, West aro South West Garo Hills a·jani ning·o donggipa Rongram, Rerapara aro Gambegre block-ni dam 41-mangni gita songrangna chirangko on·na man·gnok aro Tura jillaoba chi on·aniko bariatna man·gnok.
Da·o dipet ia songrang, Tura Urban Water Supply Scheme-onikon chirangko man·engkuachim indiba ia project-ko matchotahaode, ia project-onikon chirangko man·skagnok.
Ia Bulk Water Supply Project-na pangchakaniko songe on·angani somoio a·dokni Chief Minister, jinmana aganprakangengon, 2028 bilsini gisepo Meghalaya a·dokni economy-ko 10 US Dollar economy ong·atna gitade bilsio GDP-ko 11.5 percent ong·atna gita nangenga ine parakangaha.
“Da·o dipet Meghalaya a·dokni economy kror 45,000-san ong·kuengpiti aro iako namdapatna nangenga. Ian sorkarina namen rakbegipa kam ong·enga indiba chingni nisanko chu·sokgipa ong·atna chinga roadmap-ko tariaha,” ine Sangma aganaha.
Dingtang dingtang department-rango kamrangko name chu·sokatna man·jaengani gimin janapangengon, batanggimin bilsi bongani gisepo uni MDA 2.0 sorkari, dingtang dingtang neng·nikanirangko namatna man·aha ine Chief Minister parakataha.
PMGSY, PMAY, JJM, MGNREGS aro uandakgipa dingtang dingtang scheme-rangko name chu·sokatna man·ahani gimin Meghalaya a·dok upattirangko man·aha aro ia scheme-rangna tangka paisarangko man·dapaha ineba Sangma aganaha.
State Water Policy aro gipin scheme-rangni gimin janapatskaengon, “2019 bilsina skangde PHE department-na gong kror 50-na komibate tangka paisarangko chamrongachim indiba da·o ia sorkari, PHE department-na tangka chamaniko gong kror 3000-ona bariataha. Manderangna chirangko on·anio chagrongna nangenggipa neng·nikanirangko namatna gitaba ia sorkari, cholrangko sandienga,” ine Chief Minister parakataha.
Ballonggre-o kr 100-ni Bulk Water Supply Project-na pangchakaniko songa
Date:
Share post:
