SHILLONG: India a·songni bang·bata biaprango ong·enga gitan Meghalaya a·dokoba INDIA bloc-o bak ong·enggipa mitam politician-rang aro MLA-rang, Bharatiya Janata Party (BJP)-o napangnaba gnang ine chanchichipenga.
Da·o dipet iani bidingo darangba tik ong·e aganna man·kujaengoba, da·o ong·enggipa Assembly session-ni ja·man TMC aro Congress dolni adita sak MLA-rang, BJP-o napangnaba gnang ine chanchichiptokenga.
Mitam kobor on·timgiparangni u·iatani gitade, TMC-ni MLA sakbri aro Congress-ni MLA sakgni, BJP-o napangani cholrang dongenga.
TMC-ni gitcham MLA Winnerson Sangma aro gipin gitcham MLA-rangba, BJP-o napangani cholrang dongenga ineba kobor on·timgiparang parakataha.
Indake ong·engon, da·o dipet iani bidingo ua an·tangde maming koborrangko man·soa dongkuja indiba BJP-ona re·bana sikenggiparangnade uamang do·gako oe donaienga ine BJP Meghalaya-ni spokesperson M Kharkrang parakatskaaha.
Apsan daken TMC-ni dilgiparangba, iani bidingo maming kobor dongja ine parakataha.
Kobor on·timgiparangni u·iatani gitade, Assembly-o da·o ong·atenggipa budget session-ni ja·man BJP-o napanggen ine Salmanpara constituency-ni gitcham MLA Winnerson Sangma-de parakmanskaaha.
Iani bidingo Congress Legislature Party (CLP)-ni dilgipa Ronnie V Lyngdoh-o sing·sandiatskaon, Congress dolni MLA-rangde darangba BJP-o napangna miksongenggiparang dongja ine parakatskaaha.
“Congress-ni MLA-rangde darangba BJP-o napangna sigiparang dongja indiba gipin dolrangni giminde anga an·tangba ma·sija,” ine ua aganaha.