Chief Minister-na memorandum on·a
SHILLONG: Assam a·dokko man·chape India a·songni dingtang dingtang biaprango Kristianrangni kosako dokkol ka·anirang batroroengani gimin iandake Kristianrangni kosako dokkol ka·aniko dontongchina aro dos dakgipa manderangni kosako rakgipa sastirangko on·na nangengani gimin Bristibar salo, a·dokni Education Minister Rakkam A Sangma janapatenba, iani bidingo Assam sorkari aro ma·mong sorkari baksa agangrikchina, a·dokni Chief Minister Conrad K Sangma-na sedoataha.
Re·anggipa antio, South Garo Hills a·jani Siju Parish-o kam ka·enggipa Sister Rosemary-ko Assam a·dokni Goalpara jolo, bus garini conductor aro gario songreenggipa mitam manderang, uni toromko aro uni olakkiani bewalrangko chonnike aganahachim aro Dudhnoi-oni Goalpara-ona re·angengmitingo sikdikdikgipa biap damsao uko garioniko a·rikgale galangahachim.
Iandake Catholic Sister saksako kragija dakahani gimin an·tangni suk ong·gijaniko parakatengon, mikkangchi iandakgipa obostarang ong·taijana gita dos dakgipa manderangni kosako rakgipa ja·kuko de·china gita a·dokni Education Minister, Assam-ni Chief Minister aro ma·mong sorkarini dilgiparangko gronge agangrikchina a·dokni Chief Minister-na sedoatgipa chittio janapataha.
“India a·song gita jakgitelgipa a·songo, mongsongbate Meghalaya a·dok baksa nangchapgipa Assam a·dokon iandake Kristianrangni kosako dokkol ka·anirangko knasoe anga namen duk ong·a. Iandakgipa kamko pilakan jegalna nangchongmota aro je jat ba toromba ong·ja maina, mandena aro mongsongbate me·chikrangna iandakgipa obostarang ong·na nangja,” ine Sangma parakataha.
Iandake dokkol ka·aniko man·ani ja·man ia sister, kenjagokataniko man·e gisikni gita dongtogijaniko man·engaha aro saksan songrena gita kenengaha ineba ua parakataha.
Ia a·selni bidingo sorkari ma·simanaha aro iani bidingo Assam-ni Chief Minister baksa agangrikataha ine Meghalaya a·dokni Chief Minister Conrad K Sangma parakatskaahachim.
Ia a·selni bidingo Assam-ni Chief Minister, nanga gita ja·kurangko de·na ku·rachakaniko on·ataha ineba ua aganaha.