SHILLONG: Adita salrangna skang, Bangladesh a·songni manderang, India-ona napdrabae East Jaintia Hills a·jani song damsao mande saksako so·ote galangani ja·man, simarango nirokenggipa Border Security Force (BSF)-ni kamrangko Sutnga-Saipung-ni MLA Santa Mary Shylla sing·doataha.
Iani bidingo Assembly-ni session-o chanchirimaniko dakdilangengon, Lumsoki songona Bangladesh a·songni manderang napdrabaenba, songni mande saksako so·ote galanganichi sima jolrango songdongenggipa manderangna kenjagokataniko ra·baaha ine Shylla, an·tangni suk ong·gijaniko parakataha.
Simarango songdongenggipa manderangko nirokna donenggipa BSF sipairang maiko dakenga dongtokenga ine sing·doatengon, iandake simarango songdongenggipa manderangna BSF-ni chel·chakanirangko on·na man·janiara ra·chakna man·gijani ong·enga ine Shylla aganaha.
Simarango songdongenggipa manderangna BSF, maming naljokanirangko on·na man·jaenga ine an·tangni suk ong·gijaniko parakatskaengon, batanggimin changrangoba Bangladesh a·songoni napsrukbagipa manderang apsan daken ia jolrango songdongenggipa manderangna kenjagokanirangko on·aha ine iani bidingo BSF baksa agangrikatchina gita MLA, a·dok sorkariko didiangaha.
Uni nangnikanirangna aganchakaniko on·angskaengon, Lumsoki songo ong·gipa a·selni bidingo Lumshnong Police Station-o mokordomako segataha ine a·dokni Deputy Chief Minister aro Home Minister Prestone Tynsong parakataha.
Sima jolrang gita re·rurana man·engani gimin mitam simarango fencing-rangko kakujani gimin iandakgipa a·selrang ong·enga ine ku·chakatengon, a·song damgnini simarango ong·enggipa obostarangko namatna gita a·song damgnini gisepoba agangrikaniko nangenga ine Tynsong aganaha.
Ia a·sel ong·ani ja·man East Jaintia Hills a·jani SP, BSF baksa tom·e agangrikaha aro ia tom·ani report-na ua sengkuenga ine janapatengon, Indo-Bangla simao dam 13 police station-rang baksana dam 19 anti-infiltration unit-rangkoba songaha ine Home Minister parakataha.
Ia jolrango police-rang, BSF baksa nangrime am·sandianirangko aro nirok sandianirangko dakenga ineba Tynsong talataniko on·angaha.