GH-ni tourism-ko tang·doatchina Saleng, sorkariko didia

SHILLONG: Garo Hills-ni tourism-ko dingtang ding-tang dakgipa ja·ku de·ani-rangko ra·e tang·doatchina a·dok sorkariko Opposition MLA Saleng Sangma sing·doangaha, tourist hub dake ruute chalaina bilsi gimiko changsa changgni dake event-ko ong·ataiode Garo Hills-ko tang·do-atangna dakchakgipa ong·jawa ine ua aganaha.
Garo Hills-o adita tourist biaprang donga jekia Waro Chora aro mitam biaprang donga jean bang·a manderang nina sikgiparang donga ine ja·mano Sangma ia kattarangko aganangaha.
A·dokni bak ong·e Garo Hills-o tourist-rangni re·baanirang namen komianirangko nikna man·enga ine Garo HIlls-ni tourism a·bao Saleng Sangma aganangaha.
Garo Hills-o maidake tourism-ko tang·doatna nanga iani bidingo sor-karioni maming mechanism-o ja·ku de·ako nikja ine ua aganaha. Adita project-rang re·baenga a·dokni ia side-o adita bang·a toursim project-rangnaba chamaha ine ua agandapangaha.
Dingtang dingtang scheme-rang baksa re·baenggiparangna sorkariko ua didiangaha, Garo Hills-oni bang·a manderangan Home Stay nokrangko rikna tangka loan-rangko ra·enga indiba tourist-rangni a·dita re·baanirang komiani a·sel bang·a grojinangona sokatnaba donga, ine  suk ong·gijaniko ua agan-angaha.
“Garo Hills-o tourism-ko tang·doatna mingsa minggni programme-rangko ong·atanichi tourism-ko bakroe chalaiangna man·jawa,” ine ua aganaha.
Five Star hotel-rango bang·a tangka paisarangko bon·atani pal a·doko songtangni entrepreneur-rangko tang·doatna aro didianirangko sorkari on·chongmotna nanga ine Sangma aganangaha.
Apsan cholrang baksa gimik biapon five star hotel-rang dongengaha ine ua aganaha.