Shillong-ni Bar association nokko wa·al kama

SHILLONG: Mija Sonibar walo bilsi 111 ong·pilgipa Assam-type rikgipa Shillong Bar Association nokko wa·al kamaha aro nok namen namjaha, computer-rang, asongchakani table chokkirang aro mongsonggipa gamchatgipa lekkarang nosto ong·tokaha.
Ia a·selo darangni janggi gimaani kobor dongja indiba hajalni hajal gamchata lekkarangko chimonge dongipa kutturirang nosto ong·dapaha.
Nitimgipa Bhola Yadav, a·sel ong·ani gimin aganao ua office sepango donggipa nokona mi cha·na re·angengachim unon wal 10:30 bajimango wa·al kamakosa nikaia ine aganaha.
Ua office-ona sokon bijolioni wa·al kamko nikachim indiba wa·al kamengahani gimin nokningchi  napangna man·jaha, ua aganaha.
Ua fire brigade-na u·iataha aro uamang re·bahachim indiba kimitna amjaha. Lekka bang·gipa kuttuchina kongbang dakgiparang gita wa·al cha·bakangaha aro bolni table chokkirang kamtokaha.
Fire and Emergency Services (F&ES)-ni Inspector General, Francis Kharshiing koborko man·e biapona re·baaha, Bara Bazar fire station skanggipa sokchengaha, Laitumkhrah, Upper Shillong, aro Mawlai fire station-rangba sokbaaha, ua aganaha. DGP office, DC office, aro District aro Session Judges office ia mongsonggipa office-rangona wa·al kamgniko champengna uamangni skanggipa kam ka·ani ong·aha, ua aganaha.
Chief Minister Conrad K Sangma, Deputy Chief Minister Sniawbhalang Dhar aro gipin official-rangba a·selko nina sokbaaha.
Ian rasong griani a·sel ong·aha, indiba darangni janggi gimaani dongjani gimin anga pilsa kusi ong·a indiba mongsonggipa lekkarang gimaani gimin chanchiani ong·aha ine chief minister aganaha.