SHILLONG: Bilsi gittamni gisepon NPP-chi dilenggipa MDA sorkari, lak 2.3 kamrangko ong·katate on·na man·aha aro da·o bilsisani gisepo lak 1 kamrangko ong·katdapate on·na kam ka·enga ine Sombar salo, a·dokni Chief Minister Conrad K Sangma Assembly-o parakataha.
Chief Minister-ni parakatani gitade, a·song gimiko unemployment ong·ani ba kamgri ong·e dongani 4.7% ong·engani gimin Meghalaya a·dokode 3%-san ong·e komibatengachim.
Kam ka·e cha·ani dingtang dingtang cholrangko ong·katate on·na a·dok sorkari, dingtang dingtang scheme ba program-rangko ra·gate on·enga ine janapatengon, iandakgipa scheme aro program-rangoni MGNREGS, CM-Elevate, PRIME program, FOCUS, FOCUS+, Agriculture-o Mission Mode Program, Meghalaya Grassroot Music Project, Chief Minister’s Youth Centre, National Rural Livelihood Mission and Skills Meghalaya aro uandakgipa program-rangan ong·a ine Chief Minister parakataha.
“Batanggimin bilsi 3-ni gisepo, iandakgipa dingtang dingtang program-rangchi, lak 2.3 kamrangko sorkari ong·katate on·na man·aha,” ine Sangma aganaha.
Da·o re·baenggipa bilsi bongani gisepo lak 5.5 kamrangko ong·katate on·na sorkari kamrangko ka·enga ine janapatengon, “Bilsisani gisepon lak 1 kamrangkode ong·katatna ka·dongsoenga,” ine Chief Minister aganaha.
Medical department-o sak 500 doctor-rang aro sak 30 nurse-rang, police department-o sak 1000 sipairang aro Education department-o sak 1000 skigiparangko man·chape gimik 3000-na baten kamrangko sorkarini dingtang dingtang department-rango ong·katatna man·aha ineba Chief Minister parakataha.
“Ia kamrangna agreba, a·jani gadangrango kamrangko ong·katate on·na man·aha indiba baditana kingking kamrangko ong·katatna man·ahachim chingo da·o dipet nomborrang dongja,” ine ua aganaha.
Mikkang bilsibri ba bilsi bongani gisepo, Agriculture aro uandakgipa department-rango lak 2.5-na baten kamrangko ong·katate on·na sorkari nisanko donenga ineba Chief Minister parakataha.
Chief Minister-ni aganani gitade, NRLM-ni ning·oba a·dok sorkari, lak 1 kamrangko me·chikrangna ong·katate on·na man·aha aro da·o mikkang bilsibrini gisepo Skills Meghalaya-ni ning·oba lak 1 kamrangko ong·katate on·angkugen.