Gital EC-ni ning·o ja 34-ni dormaharangko on·manaha ine CEM a·kangskaa
TURA: Garo Hills Autonomous District Council (GHADC)-o kam ka·giparangna, bangki dongkuenggipa ja 32-ni dormaharangko on·china dabienggipani bidingo, NPP-chi dilenggipa GHADC-ni Executive Committee, maming aganchakaniko on·jahani gimin Sombar saloni a·bachenge salgittamna, Non Gazetted Employees Association-ni ning·o kam ka·giparang, kamrangko dontongate jingjengatna a·bachengataha.
Sombar salo, GHADC-o kam ka·enggipa manderang, kamtangtangko dontongatenba, Te·teng A·jani College Field-o jinma tom·chimonge jingjengatna a·bachengataha.
Iani bidingo u·iataniko on·angengon, GHADC-o kam ka·enggipang gimik ja 32-ni dormaharangko man·na nangkuengani gimin ia dormaharangko on·china GHADC-ni Executive Committee (EC) baksa agangrikahachim indiba EC-ni gita maming aganchakanirangko on·na man·jahani gimin Sombar saloni a·bachenge salgittamna kamrangko ka·gija jingjengatna nangao ga·akaha ine NGEA-ni president Brithen M Sangma parakataha.
Dormaharangko on·ani bidingo GHADC-ni dilgiparang, uamangko agangrikna okamgenchimode uamang agangrikna kusi ong·aigen ineba Sangma parakataha.
NGEA president-ni u·iatani gitade, GHADC-ni dilgiparang uamangko agangrikna okamkujaskal, salantian salgittamna pring 10:00 bajioni attam 4:00 bajiona ia apsan biapon asonge jingjengatangkugen.
Indake ong·engon, da·o NGEA-ni dabienggipa ja 32-ni dormaharangde gitcham EC-rangni ning·o man·na nangkuenggipa dormaharangsa ong·a maina ia gital EC-de, 2021 bilsini March jao rikchengaonin gimik ja 34-ni dormaharangko on·na man·aha ine Sombar salo, GHADC-ni Chief Executive Membor (CEM) Albinush R Marak parakatskaaha.
Marak-ni parakatani gitade, gitcham EC-rangni somoio man·na nangkuenggipa dormaharangko aro da·o ia gital EC-ni somoio man·na nanggipa dormaharangko apsan somoio on·anide EC-na neng·beani kam ong·engachim.
“Da·o rikenggipa EC, dormaharangko on·jaenga ine NGEA-ni matnanganiara kakket ong·ja aro da·o uamangni office picketing ka·e jingjengataniara office-o kam nangchongmotgipa manderangna neng·nikanirangko ra·baani gitasa ong·enga. NGEA-ni mitam dilgiparang aro gipin kam ka·giparangnaba nangchongmotgiparangnade uamangni man·na nangkuenggipa dormaharangko chinga tangka paisa donga donggijako nigrike advance salary dake on·ataha. NGEA-ni mitam dilgiparangde dormaha ra·angan gimik ja 37 ba ja 38 ong·pilengaha indiba gimiknade dormaharangko on·na gita chingo chu·onga gita tangka paisarang dongja,” ine Marak parakataha.
GHADC-o kam ka·enggipa manderangni man·na nangkuenggipa dormaharangko on·na gita EC, ma·mong sorkarioniko tangka paisarangko man·bana jotton ka·enga aro GHADC-o kajinarangko nambate chimongna uamang kam ka·giparang baksa nangrime kamko ka·na miksongenga ineba CEM parakataha.