SHILLONG: Meghalaya a·doko police-ni kamko ka·enggipa manderang jemangan bilgri ong·a aro bilsi re·ange kamko ka·anio neng·nikanirangko man·engahachim, uandakgipa police-rangko ra·gale galchina a·dokni Opposition Congress dol, Meghalaya sorkariko didiangaha.
Dingtang dingtang department-rango kamo ra·na gita dongimin bilsiko komiatna sorkarini miksongengani gimin iako Gambegre-ni Congress MLA aganaha.
“Badiaba badiaba department-rango kamo ra·na gita dongimin bilsiko komiatna jotton ka·aniara kamrangko ka·e cha·na cholrangko senge dongenggipa chadamberangna kragijaniko dakenga gita ong·enga. Kamna dongimin bilsiko komiatenga ong·ode uan sorkarini, bilakgipa wa·sakuenggipa aro gisikni gita bilakgipa chadamberangko kamo ra·na miksonganiko mesokaniba ong·enga,” ine Sangma aganaha.
Ia niamko sorkari ra·gatenga ong·ode, bilgrigipa aro bilsi re·anggimin manderangko, uamangni kamrangoniko ra·galskana nanga ineba ua aganaha.
Assam a·doko je police-rangan, bilgri ong·e kamko ka·na kragiparang ong·ja, uandakgipa manderangko police-ni kamrangoniko ra·galgen ine Assam Chief Minister Himanta Biswa Sarma-ni on·gipa ge·etani giminba Sangma, Assembly-o gisik ra·atpilaniko on·angaha.
“Meghalaya a·dokoba ia apsan niamkon ra·gate, bilgrigipa aro bilsi re·anggimin police-rangkode ra·galskana nanga,” ine Congress MLA aganaha.
Iani bidingo a·dokni Chief Minister Conrad K Sangma aganchakaniko on·angskaengon, police-ni kamna be·enni gita bilak-wa·sagipa ong·na nangbebea ine ku·chakangenba, district police headquarter-rango, battalion headquarter-rango aro dingtang dingtang police station-rangoba police-rangko bilake rakkina gita sorkari, gym-rangko kulie on·gen ine parakataha.
Mitam manderangde bilsi re·anggenchimode bilak-wa·sagipa ong·na man·aia aro mitam chadamberangba be·enni gita bilgrigiparang ong·skana man·aia ineba Chief Minister talataniko on·angaha.