TURA: Garo Hills Autonomous District Council (GHADC)-o kam ka·enggipa manderang, batanggimin ja 32-ni dormaharangko man·tokkujaengani gimin Sombar saloni a·bachenge salgittamna kamrangko ka·gija jingjengatanirangko dakengon, GHADC-o kam ka·enggiparangna ta·raken dormaharangko on·china gita GHADC-ni Opposition MDC-rang, NPP-chi chalaienggipa Executive Committee (EC)-ko didiataha.
Mongolbar salo, Opposition MDC-rang, jingjengatenggipa Non Gazetted Employees Association (NGEA)-ni membor-rangko gronge agangrikangani ja·man, GHADC-o kam ka·enggiparangna uamangni man·na nangkuenggipa dormaharangko ta·raken on·china GHADC-ni Chief Executive Membor (CEM) Albinush R Marak-ko didiataha.
“Da·al salni bako chinga jingjengatenggipa NGEA-ni membor-rangko gronge, uamangni neng·nikanirangko sing·sandie ra·baaha aro uni ja·man GHADC-ni CEM-ko grongenba, kam ka·enggiparangni dormaharangko on·china mol·molaha. CEM-ni chingna talatani gitade, GHADC-ni man·na nangkuenggipa tangka paisarangko a·dok sorkarioniba watatkujaengani a·sel kam ka·giparangna dormaharangko on·na man·kujaenga, uni gimin GHADC-ni man·na nangenggipa tangka paisarangko ta·raken watatchina chinga Meghalaya a·dokni Chief Minister Conrad Sangma-koba mol·molatenga,” ine Mongolbar salo, GHADC-ni Trinamool Congress (TMC) MDC Cherak W Momin, kobor ra·timgiparangna parakataha.
Da·o chalaienggipa gital EC-ko 2021 bilsini March jao rikchenga intal GHADC-o kam ka·giparangna jasanikoba watchanga grian gimik ja 34-ni dormaharangko on·manaha aro da·o NGEA-ni dabienggipa ja 32-ni dormaharangde backlog ba gitcham EC-rangni ning·o man·na nangkuenggipa dormaharangsa ong·a ine Sombar salo CEM Albinush Marak-ni parakatgipa kattarangna aganchakaniko on·angskaengon, 2015 bilsionin da·o apsan dolchi chalaienggipa Executive Committee-an GHADC-ko chalaienga aro ua bilsioni da·ona jasnimangmangsan gipin dolchi EC-ko chalaiahani gimin kam ka·giparangni man·na nangkuenggipa ja 32-ni dormaharangde ia EC-ni ning·o ga·akja aro gipin EC-rangni jakosa ga·aka ine agananiara dal·bea gualani ong·enga ine Momin parakataha.
“An·chingni nokdang a·bakkuko dakanio, jensalo A·chikni nokdang obitegipa-mamagipa, an·tangko ja·chongrikna chawariko nokona rimbaengon, ia chawariara obitegipani gro dakangako ‘mamani obiteni grosa’ ine chotgija donna man·genma? Da·alo apsan daken ia GHADC-ni EC-ko chalaienggipa dolba 2015 bilsionin EC-ko chalaibaenggipa apsan dolan ong·e an·tangni daitoko jegalna man·jawa,” ine TMC MDC parakataha.
GHADC-o kam ka·giparangni kamrangko dontonge jingjengatengani a·sel A·chik a·songni ki·tikbrionin kamrang ja·donggaatako man·e neng·nikanirangko chagrongna nangtokenga ineba Momin parakataha aro GHADC-o kam ka·giparangna ta·raken, jegita man·a dormaharangko on·china ine GHADC-ni EC-ko didiataha.