SHILLONG: Meghalaya a·doko Congress aro Trinamool Congress (TMC) dolgnian, I.N.D.I.A bloc-ni bakrang ong·engon, ia bilsini Lok Sabha election-o dolgni bakrime susaani dongjawa.
Iani bidingo talataniko on·angengon, Meghalaya a·dokode Congress aro TMC-ni gisepo Lok Sabha seat-rangko sualgrikani dongjawa aro dolgnian doltangtangni gitasa susaaigen ine Meghalaya Pradesh Congress Committee (MPCC)-ni president Vincent H Pala parakataha.
Pala-ni aganani gitade, Tura Lok Sabha constituency-oba Congress aro TMC dolgnian an·tangtangni candidate-rangko susaatgen.
Ia chang Lok Sabha election-o Bharatiya Janata Party (BJP)-chi dilenggipa ma·mong sorkariko be·gruatna gita miksonganio, Congress aro TMC dolrangkoba man·chape, BJP-ni kosako chakatenggipa dingtang dingtang political dolrang, I.N.D.I.A bloc-ni ning·o, seat-rangko sualgrike susagriktokengachim ine nikna man·a.
Indake ong·genchimoba, Meghalaya a·dokode Congress aro TMC dolgnian, I.N.D.I.A bloc-ni bakrang ong·paengoba, ia Lok Sabha election-o doltangtangni gitasa susana tik ka·skaaha.
Kobor on·timgiparangni u·iatani gitade, Tura Lok Sabha constituency-o Congress dol, Gambegre-ni MLA Saleng A Sangma-ko susaatna tik ka·ahaon, TMC-ni gita a·dokni gitcham minister Zenith Sangma-ko susaatskana manchienga.
Apsan daken Shillong Lok Sabha constituency-oba, Congress dol da·o ong·enggipa MP Vincent Pala-kon susaattaiengon, TMC-ni gitaba candidate-ko susaatani cholrang donga ine kobor on·timgiparang u·iataha.