SHILLONG: Adita salrangna skang, Hynniewtrep Youth Council (HYC) Riwar Mihngi circle-ni membor-rangko Pynursla Police Station-ni 2nd officer-in-charge, kragija dake dokaha ine matnangenggipani bidingo report-ko on·atchina gita Bristibar salo, Meghalaya Human Rights Commission (MHRC), East Khasi Hills a·jani Superintendent of Police (SP)-na seachi u·iataha.
Re·anggipa February-ni 24 tariko, HYC Ri War Mihngi Circle-ni membor-rang, Bangladesh a·songona matmarangko watatna miksonge ra·angenggipa truck bolgniko rim·enba, iani bidingo FIR ka·na gita Pynursla Police Station-ona re·angahachim indiba police station-ona sokangon, police station-ni 2nd officer-in-charge, uamangni badi ka·anirangko ra·chakgija, HYC-ni membor-rangkosa raka kattarangchi agane jak sokskaaha ine HYC-ni dilgiparang badi ka·doangahachim.
Pynursla Police Station-ni second officer-in-charge George Dkhar, uamangni FIR-ko segatna jechakaha aro batesa HYC-ni membor Lamphrang Khonglam-ko kragija dake dokaha ine HYC-ni dilgiparang matnangataha.
Truck garirangko rim·ahani gimin HYC-ni membor-rangko ia police officer, ka·mikkenatpilaha ineba HYC-ni dilgiparang matnangahachim.
Indake ong·engon, ia a·selni bidingo chu·gimik report-ko sal 15-ni gisepon on·atchina gita Commission, East Khasi Hills a·jani SP-na seataha ine MHRC-ni Secretary u·iataha.