SHILLONG: Shillong songjinmani Laban-o donggipa Maxwelton Estate-o Tribal ong·gijagipa manderangsa niam gri songdong a·chatokenga ine Khasi Students Union (KSU) parakatenba, ia biapko uamang maming dakeba gnigipa Them Metor ong·atna on·jawa ine mikrakataniko on·angaha.
Maxwelton Estate-o Tribal ong·gijagipa manderangni songdong a·chaaniko jegalna aro ia manderangko a·rikgalchina sorkariko mikrakatenba, Bristibar salo KSU-ni membor-rang, Maxwelton Estate-o nokgri jamgri ong·enggipa Khasirangna nokrangko rike on·skaaha.
KSU Laban circle-ni president Reuben Najair-ni u·iatani gitade, Maxwelton Estate-ni acre 9 ong·gipa a·ao niam gri songdongenggipa Non-Tribal-rangko aro matchu jile cha·enggiparangko a·rikgalchina re·anggipa February 14 tarikon uamang, sorkarina sal 15 somoiko on·ahachim indiba uamangni on·gimin somoio sorkari, ia biapo songdongenggipa Non-Tribal-rangko a·riljahani gimin sorkarini kosako jegalaniko mesokna Bristibar salo, ia biapo donggipa Khasirangna nokrangko rike on·skaaha.
Khasirangna KSU-ni rike on·gipa nokrangko pe·e galjachina district administration-ko mikrakatengon, “Sorkari manigija Khasirangna rike on·gipa nokrangko pe·e galgenchimode chingaba ia jolo donggipa pilak nokrangkon pe·e galskagen,” ine KSU Laban-ni president parakataha.
Ia Maxwelton Estate-o bang·a gipin jatrangan, Dorbar Shnong-rangni permission-rangko ra·chenggijasa niam gri songdong a·chatokenga ineba KSU matnangataha.
Maxwelton Estate-o songdongenggipa manderangara niam gri songdongenggiparangsa ong·bebegenchimode ia biaponi apjitna gita tarie dongna nanggen ine adita salrangna skangsan, a·dokni Deputy Chief Minister aro Home (Police) Minister Prestone Tynsong aganahachim ine nikna man·a.
“Darangba niamni kosako re·na bil dongja arp ia biapo songdongenggipa manderangara niam gri songdongenggiparangsa ong·genchimode niamo pangchake, uamang dingtang biapona apjitna nanggen,” ine Tynsong aganahachim.