PA Sangma sagina CM mande ra·pilskaaniko on·anga
TURA: South Garo Hills a·jani Baghmara-o donggipa Capt Williamson Memorial Govt College-ni gital Academic Block baksana Girls aro Boys’ Hostel-rangko Sombar salo, a·dokni Chief Minister Conrad K Sangma nokdonggae on·angaha aro ia gital nokrangko nokdonggae on·anganio a·dokni Education Minister Rakkam A Sangma, Baghmara-ni MLA Kartush R Marak, a·dok sorkarini Chief Advisor Lahkmen Rymbui, a·dokni Chief Secretary DP Wahlang aro dingtang dingtang dilgiparangba dongpae bak ra·angtokaha.
Ia college-ni Academic Block-ko State Higher Education Council (SHEC)-ni nirokanio rikna gita gong kror 10.80 tangkarangko chamaha aro me·chik me·asarangni hostel-ko rikna gong kror 1.20 tangkarangko chamskaahachim.
Ia Capt Williamson Memorial Govt College-ni gital Academic Block aro hostel-rangko nokdonggae on·anganio a·dokni Chief Minister, jinmana aganprakangengon, ia college-ni building-rangko rikna gita Lok Sabha-ni gitcham Speaker PA Sangma sagi, 2008 bilsio pangchakaniko songe on·aha aro da·alo uni changchetgipa siani salo ia nokrangko nokdonggae on·na man·aniara una nambatgipa mande ra·pilskaaniko on·ani gita ong·enga ine parakataha.
Lekka porani kamrango dingtanganiko ra·bana kam ka·dilahani gimin ua gitcham sorkarini Education Minister aro gipin dilgiparangkoba mittelpilangaha.
Bilsi bongana skang Education department-ni dongimin nisanrangko da·o chu·sokatna man·engaha ine janapatengon, mikkangchiba da·o ong·enggipa Education Minister-ni dilanichi lekka porani kamrango bang·en dingtanganiko nikangkuna sienga ine Chief Minister parakataha.
Bilsi bongani gisepon ia Baghmara college-na gital nokrangko rike on·na man·aha ine janapatskaengon, Sohra, Williamnagar aro Baghmara college-rango Science aro Commerce stream kulina proposal on·aniko bakan Cabinet ra·chakgnok ine Sangma parakataha.
“Lekka poranian ia sorkarini mongsonggipa daito ong·ani giminsa ia 2024-25 bilsini gisepo a·dok sorkari, Education department-na tangka chamaniko gong kror 27-oni kror 350-ona bariataha,” ine ua aganaha.
South Garo Hills a·jana sorkarini ka·enggipa kamrangni gimin janapangkuengon, Baghmara Civil Hospital-o ge 150 palangrangko on·dapna gita gong crore 15 tangkarangko DoNER Ministry-ni gita chamatenga aro hospital-o kam ka·enggipa doctor aro nurse-rangna staff quarter-rangko rikna gita a·dok sorkari, gong crore 5 tangkarangko chamdapatenga ine Chief Minister parakataha.
Baghmara Govt College-ko centre of excellence ong·atna gita college-o skigiparangko aro chatro chatrirangko bakrime kam ka·china gitaba Chief Minister didiangaha.
Ia nokrangko nokdonggae on·anganio a·dokni Education Minister Rakkam Sangma-ba jinmana aganprakangengon, ia college-ko kulichengaoni dal·rorobana man·ahani gimin an·tangni kusi ong·aniko parakatenba, ia college-ni Academic Block baksana Girls aro Boys Hostel-ko kulianiara South Garo Hills a·ja gimiko songdongenggipa manderangna gisik ra·ani sal ong·gen ine parakataha.