TURA: West Bengal a·dokni North 24 Parganas a·jao donggipa Sandeshkali jolo, me·chikrangni kosako kragija kamrangko a·dok sorkari dakna on·enga ine Garo Hills-ni Akhil Bharatiya Vidyarthi Parishad (ABVP) matnangatenba, iani bidingo nanga gita ja·kurangko de·china a·songni President Droupadi Murmu-na sedoataha.
A·songni President-na sedoatgipa chittiko ABVP Garo Hills-ni dilgiparang, chong·motan state secretary Tengku M Marak, state joint secretary Sushinanda Hajong, West Garo Hills district convenor Ninenora T Sangma, Tura Town secretary Rikkimbi M Sangma aro gipin dilgiparang, West Garo Hills a·jani Additional Deputy Commissioner (ADC) Dolrich Berin G Momin-ni jako on·ataha.
West Bengal a·dokni Sandeshkali jolo me·chikrangko, sorkarini nokchakenggipa manderang, kragija dake kal·ake roenga aro uamangni nokdangrangko dokkol ka·e roenga ine matnangatenba, ia me·chikrangko chel·chakchina aro kakket bichal on·china ABVP-ni dilgiparang, a·songni President-ko didiataha.
“Mandeko iandakgipa ong·siaona ra·baahani gimin ABVP namen suk ong·ja aro iandakgipa kamko raken jegalatenga,” ine a·songni President Droupadi Murmu-na seatgipa chittio ABVP Garo Hills-ni dilgiparang parakataha.
