Shillong: A·doko me·chikrangko bilakbatatna gita bang·bate tangka-paisarangko chamaha ine a·dokni Health aro Family Welfare Minister, Ampareen Lyngdoh mija Sukrobaro aganaha.
Meghalayao me·chikrangni janggi tangani gadango ra·dona aro me·chikrangko bil gnangatna gita a·doko me·chikrangni bading-chiwalanina gisiko nanganiko Chief Minister, Conrad K. Sangma nikaha ine Lyngdoh adita salrangna skango aganahachim.
“Gimikna bate Gong kror 5271 budget-ko me·chikrangni namgnina chamaha. Ian me·chikrangni namgnina an·chingni man·sogipa tangka ong·a. Indake ong·engon, iani namgniko a·dokni pilak biaprangogipa me·chikrangan dolrangan man·na nanggen,” ua aganaha.
Me·chikrangni janggi tangani obostako tang·doatna gita ia tangka paisarangchi me·chikrangna ong·atgipa pilak programrangon sorkari, me·chikrangko namedake bak ra·na on·na nanggen ineba Health aro Family Welfare Minister aganaha.
“Chamgimin tangka-paisarangoniko Sorkari 18% kode me·chikrangni an·sengbaljoke donganina sorkari jakkalgen. 25 percent-ko Community aro Rural Development-o jakkalgen,’ Lyngdoh aganaha.
