TMC-ba Tura LS seat-na susana tik ka·a

NEW DELHI: Meghalaya a·doko Congress dol, seat sualgrike susaaniko jegalatahani gimin ia Lok Sabha election-o Trinamool Congress (TMC) dolba Tura parliamentary seat-oni susana tik ka·angskaaha.
Ia Lok Sabha election-o Congress dol, TMC baksa seat sualgrike susana nangnikjahani gimin Meghalaya a·dokko man·chape West Bengal aro Assam a·dokrangoba doltangari susaaigen ine Robibar salo TMC parakatskaaha.
Koborko on·ani gitade, ia Lok Sabha election-o TMC, Assam-ni seat damgni, Meghalaya a·dokni Tura Parliamentary constituency aro West Bengal a·dokni pilak Lok Sabha constituency-rangon susana tik ka·aha.
Iana skang Congress dolni gitade, Meghalaya a·dokni seat damgni, chong·motan Shillong aro Tura Lok Sabha constituency damgnionin susana gita candidate-rangkoba parakatmanahachim. Assam aro West Bengal a·dokrangode Congress dolni dilgipa Rahul Gandhi-ni dilanichi, gipin dolrang baksa bakrime susana miksonganirang dongskaengachim.
INDIA bloc-o TMC name kim·kimgipa ong·kujaengoba, Assam-o Assam Trinamool Congress (TMC)-de Congress dolchi dilenggipa dol 16-ni United Opposition Forum-o bak ong·skaengachim.