WILLIAMNAGAR: Mongolbar salo, East Garo Hills a·jani Samanda C&RD Block ning·o donggipa Doktilgre aro Dinaminggre songrangna Rashtriya Krishi Vikas Yojna (RKVY) project-rangko, a·dokni Soil & Water Conservation Minister Marcuise N Marak-ni jakchi a·bachengate on·angaha aro ia tom·aniko ong·atanio, Samanda Block-ni BDO Tochri R Sangma, Rongjeng Civil Sub-Division-ni SDO Reuben Ch Momin, Soil & Water Conservation department-ni official-rang, songni Nokmarang aro songni nokni manderangba dongpae bak ra·angtokaha.
Ia RKVY project-rangko a·bachengate on·angani somoio Soil & Water Conservation Minister, jinmana aganprakangengon, dingtang dingtang department-ni ning·o dingtang dingtang namroro silroroatani project-rangko ra·gate on·anichi, Meghalaya a·dokko ’10 Billion Economy’ ong·atna gita a·dokni Chief Minister Conrad K Sangma, rakbee kamrangko ka·enga ine parakataha.
Chief Minister-ni dilanichi, Williamnagar-o bang·en namroro silroroaniko nikna man·aha ineba Marak aganaha.
Dinaminggre aro Doktilgre songrangko RKVY scheme-ni ning·o ra·anichi, songo game ge·e cha·enggipa manderang bang·en namgnirangko man·gnok ineba ua aganaha.
Ia program-ko ong·atanio dongpae jinmana aganprakanggipa gipin manderangara, Rongjeng-ni SDO (C) Reuben Ch Momin baksana Dinaminggre aro Doktilgre songni dilgiparang ong·a.
Iana skang, a·dokni Soil & Water Conservation Minister Marcuise N Marak, Samanda Megapgre-ni Pilot Extension Centre-o gital rikgipa Muga Grainage Hall-ko nokdonggae on·angchengaha.
