CM Elevate program-chi lak 5 kamrangko ong·katatgen: CM
TURA: Budbar salo, Garo Hills-o bading chiwale cha·enggipa manderangna CM-Elevate program-ko Tura-ni District Auditorium-o ong·atangaha aro ia program-ko ong·atanio CM-Elevate-ni dingtang dingtang scheme-rangko man·enggipa manderangna a·dokni Chief Minister Conrad K Sangma aro gipin dilgiparangni jakchi sanction order-rangko pakwate on·angaha.
CM Elevate program-ni ning·o Agri-Response Vehicle, Agri-Warehouse, Common Facility Centre, Piggery, Poultry aro Goat Farming scheme-rangko man·enggipa manderangna ia tom·anio Chief Minister aro gipin dilgiparangni jakchi sanction order-rangko on·angaha.
Ia tom·bimonganiko ong·atanio, a·dokni Chief Minister Conrad K Sangma, jinmana aganprakangengon, dal·e niksamsoani gnang kamrangko ka·jaode a·dok namroro silrorona man·jawa aro sorkarini kamrango a·dokni chadamberang, me·chikrang, game ge·e cha·giparang, bading chiwalgiparang aro pilakan bak ong·pagenosa a·dok namroro silrorona man·gen ine parakataha.
Ia CM-Elevate program-ni bidingo talataniko on·angengon, 2028 bilsini gisepo Meghalaya a·dokko Billion Dollar 10 economy ong·atna aro a·songo dal·dalgipa gipin a·dokrang baksa apsan gadango ong·atna gita ian sorkarini niksamsoe ra·gatgipa program ong·a ine Chief Minister parakataha.
Batanggimin bilsisa atani gisepo a·dokni economy, gong kror 45,000-oni gong kror 56,000-ona tang·doangaha ine janapatskaengon, a·dokni economy-ko tang·doatangkuna gita a·doko tangka paisarangko koros ka·na nangkuengani gimin Sangma aganangaha.
“Ia CM Elevate program-ara bading chiwale cha·giparangna aro bading chiwalanirangko a·bachengatna sikenggipa chadamberangna tangka paisani gita dakchakanirangko on·enggipa program ong·a aro ia program-ko a·bachengatanichi da·o bilsibri atani gisepon chinga komibeoba lak 5 kamrangko nakatate on·na ka·dongsoenga,” ine Chief Minister aganaha.
Chief Minister-ni parakatani gitade, Tura-o IT Park-ko kulina gita work order-ko on·manahani gimin ian Tura jilla aro Garo Hills gimikni chadamberangnan ming 5000-na baten kamrangko nakatate on·na dakchakgen.
Ia tom·anio a·dokni Chief Minister, Village Data Volunteer (VDV)-rangni appointment letter-rangko aro Tura-ni Rongkhon Songgital-o galenggipa jabolrangko Bio-Mining dakna gitaba work order-ko pakwate on·angjolaha.
Ia program-ko ong·atanio dongpae bakko ra·anggipa gipin manderangara, Meghalaya Legislative Assembly-ni Deputy Speaker Timothy D Shira, a·dokni Power Minister AT Mondal, PHE Minister Marcuise N Marak, Tura-ni Lok Sabha MP Agatha K Sangma, MLA-rang aro gipinrang ong·a.