Mendipathar-o Industrial Unit-ko kulina a·ako CM-ni jakchi pakwate on·anga

RESUBELPARA: North Garo Hills a·jani Mendipathar Industrial Growth Centre-o industrial unit ba karkanako kulina gita Sukrobar salo, a·dokni Chief Minister Conrad K Sangma, a·ani lekkarangko Varun Beverages Limited-na pakwate on·angaha aro iano Meghalaya Industrial Development Corporation (MIDC)-ni Chairman James PK Sangma, Mendipathar-ni MLA Marthon J Sangma aro gipin dilgiparangba dongpae bak ra·angaha.
Ia tom·anio, Varun Beverages Limited-ni Executive Director aro CEO Kamlesh Jain, jinmana aganprakangengon, ia karkanako rikna gita a·ako on·aniara ia jolrango bading chiwalaniko tang·doatna cholko on·anisan ong·aigija Meghalaya a·dokni namroro silroroanina cholko on·ani gitaba ong·enga ine parakataha.
Ia Pepsico karkanako kulianichi a·doko economic-ko tang·doatna dakchakanisan ong·aigija komibeoba sak 500 manderangna kamrangko ka·e cha·na chol ong·gen ineba ua aganaha.
Pepsi, coke aro uandakgipa ringanirangko tarianio Varun Beverages Limited company-an mongsonggipa company-rangoni dolsa ong·engachim ine nikna man·a.
Ia tom·anio a·dokni Chief Minister Conrad K Sangma-ba jinmana aganprakangengon, ia biapo industrial unit-ko kulina ja·ku de·chakataniara 2028 bilsini gisepo Meghalaya a·dokko 10 billion dollar economy ong·atna sorkarini niksamsoe kam ka·aniko chu·sokatna ja·ku de·ani ong·enga ine parakataha.
Mendipathar Industrial Growth Centre-o ia industrial unit-ko rikmanahaode iano Pepsico-ni ringanirang, jekai Pepsi, Pepsi Black, Sting, Mirinda Orange aro uandakgipa ringanirangko botolrango chipe Meghalaya a·dokni dingtang dingtang biaprangona aro Assam, North Bengal aro uandakgipa biaprangonaba watatgnok ineba Chief Minister aganaha.
Mendipathar-o ia karkanako kulina gita ia company, gong crore 185-mangni gita tangka paisarangko koros ka·gen aro ja 12-ni gisepon ia karkanako kulina ka·dongsoenga ineba ua aganaha.
Chief Minister-ni aganani gitade, ia biapo industrial unit-ko kulianichi ia jolrango rama jal·langrangko namdapatan baksana jolni manderangna kamrangko ka·e cha·na gitaba cholrang ong·katgnok.
Ia tom·anio jinmana aganprakanggipa gipin manderangara, MIDC-ni Chairman James PK Sangma, Mendipathar MLA Marthon J Sangma, North Garo Hills a·jani Deputy Commissioner AK Singh aro DCIC-ni General Manager George Frankie W Pariat ong·a.