Shillong: Jinma manderangni natok ripengggipa biapko namroroatna gita salgnini workshop-ko West Garo Hills, Tura-ni Polo Orchid-o March 11 aro March 12, 2024-o ong·ataha. Ua workshop-ko Department of Fisheries, Meghalaya Sorkari aro GIZ apsan melie ong·ataha, aro apsan somoio MoEF&CC aro GIZ-ni, German Federal Ministry for the Environment, Nature Conservation, Nuclear Safety and Consumer Protection (BMUV) under the International Climate Initiative (IKI)-ni chakataniko man·e apsan melie chamatanichi ‘Protection and Sustainable Management of Aquatic Resources in the North Eastern Himalayan Region of India” (NERAQ)-ko a·bachengataha.
Ua workshop-o, Department of Fisheries, Government of Meghalaya baksana Department of Forest, Government of Nagaland-ni sak 25 manderang bak ra·angaha. West Garo Hills aro East Garo Hilss-ni na·tok ripingipa biap ba fish santuary-ni community manager-rangko Don Bosco College-ni Department of Zoology-ni skigiparang baksa okamataha.
Senior Advisor, GIZ Kenneth M Pala, rimchaksoanio aganprakanio, scientific jaku de·anichi gamchatgipa jakalani aro jinma manderangni na·tok ripinggipa biapko ma·sie ra·na gita bak ra·giparangko okamataha.
Programme-ni chief moderator Institute of Inland Fisheries Potsdam Sacrow Lake and River Fisheries, Germany-ni Director Dr Uwe Brämick, na·tok ripinggipa biaprang maidakgipa neng·nikanirangko chagronga, aro na·tok donnanio maidakgipa gualanirangko dakachim, uni bidingo aro dingtang obostarangni talate mesokangangaha.
Jinma manderangni na·tok ripinggipa biapko ripingani aro chelchakani bidingo maidakgipa neng·nikanirangko chagronga uni gimin chanchirimaha. Uarangni bidingo na·tok ripinggipa biapni, jinma manderangni manager-rang an·tangtangni neng·nikanirangko chanchirimaha. Na·tok ripinggipa biaprangko nambatatrorona dakchakani bidingo bak ra·giparang gisik on·paha.
Ge-2 seat-na susani poll-ni bidingo March 20 tariko u·iataniko dakgen, aro nomination ka·ani bon·kamgipa sal March 27 tariko ong·gen. March 28 tariko nambee nie ra·ani aro porika ka·aniko dakgen. Candidate-rangni an·tangni bimingko ra·galpilani bon·chotgipa salra March 30 tariko ong·gen. A·song gimikon June 4 tariko vote-ko chananiko dakgen.
Chief Electoral Officer, BDR Tiwari, Sonibaro media-ni manderangna aganani gita, a·doko gimik ge-2217100 elector-rang dongaha, jean January 5, 2024-ona kingking nie ra·ani gita ong·aha, jeon sak 1094947 me·asarang, sak 1122150 me·chikrang aro sak 3 gittamgipa gadango donggiparang ong·aha.
2024 bilsini EP Ratio-ra 646 ong·aha, tossuanio re·anggipa 2018 bilsio 507 ong·ahachim. Ia changni gender ratio-ra 1025 ong·aha, jekon tosusanio 2018 bilsio 1019 ong·skaha.
Chu·gimik sak 3835 Service voter-rang, sak 11179 PWD Voter-rang, sak 23793 80+ voter-rang, sak 10345 85+ voter-rang aro sak 5 NRI elector-rang dongaha.
Tiwari-ni aganani gita, gimik ge-3512 polling station-rang ge-2 constituency-rango donggen, uno ge-326 urban-o (jilarang) aro ge-3186 rural area (songadamrang) aro average nomborni polling station-ra ge-631 ong·gen.
Gimik me·chikrangni jako ra·gipa Polling station-ra ge-60 ong·gen, una agreba ge-37 chadamberangni jako ra·gipa Polling station-rang ong·gen. Unbaksa ge-60 model polling station-rang donggen.
EVMs-ni gimin agangenchimode, ge-5873 ballot units, ge-7181control units aro ge- 5790 VVPATS-ko Meghalaya-ni ge-2 polling constituency-rango dongen.
Tura-o re·anggipa ge-2 Lok Sabha election-o vote on·giparangni komiako nikna man·aha. 2014-ni election-o Shillong-o 63.28 percent ong·aha, unon bang·gija tang·doe 2018 bilsini election-o 65.48 ong·aha. Tura-ora 2014 bilsio 79.14 aro 2019-o 81.38 ong·aha.
CEO una agreba, jakgitel ong·e, kajia-golmaloni jakgitele aro rongtale election-ko Meghalaya-o ong·atgen, ine aganaha, iani bidingo gimikko nirikie ong·atna rakbee kamko ka·gen, ine agandapaha.
Torom aro nikdikani kattarangko politician-rangni jakalani bidingo sing·anio ua agana, iani bidingo model code of conduct committee nangani gita kamrangko ka·anggen.
Indin on·gen, ine ku·rachakaniko, churangko, aro tangkarangko poll-ni somoio on·ani bidingo sing·anio ua aganchaka, ia bidingo software donga, jean somoini gita report-rangko on·gen aro indake dakanichi indin man·gnirangko on·na ku·rachakaniko, churangko on·aniko aro tangkarangko on·aniko champengna a·dokni police aro gipin agency-rang kamko ka·gen.
U·iatdapani gita model code of conduct dongani gimin gital project-rangko parakatna man·jawa, indiba da·o ong·enggipa project-rang ong·angkuaigen.
Shillong: Shillong Quizzing Society, jeni pangchakani quizing evnet Quriosity ong·am uko Sonibaro Soso Tham Auditorium-o ong·atangaha, jean Northeast India-ni dal·begipa event ong·aha. Ia event-ra Shillong-ni bidingo gamchatgipa sing·anirang ong·aha, aro ia event-o dingtang dingtang biaprangoni jekai Tura, Sohra, Jowai, Guwahati, Tezpur aro Nalbari-oni re·bae sak 320 bak ra·angaha.
Sayan Mazumder aro Bishwayan Bhattacharjee jemangan Guwahati Medical College-ni ong·aha, uamang skanggipa ong·e tangka 50,000-ko man·angaha, jemangana nambegipa u·ia sapaniko mesokanichi sing·ani ong·arangko aganchakna man·aha. Ia susagrikanira rakbegipa ong·aha, jeon team-rang dal·batgipa boksis aro tangkana susagrikaha.
Runners-up ong·gipana tangka 25,000 on·aha aro gittamgipa gadango matchotgipana tangka gong. 10,000 on·aha. Brigipa, bongagipa aro dokgipa gadango chengiparangnaba tangka gong. 5000 prak on·aha, jemangan namen gisik nangbee sing·anirango aganchakahachim.
Anirban Paul, jean Shillong Quizzing Society-ni co-founder, Shillong-o quizzing daka rikanirangko ong·atanio susanio bak ra·giparang gisik nangbee susangtokaha.
“Shillong-o re·anggipa somoirangoba sing·anirango aganchakna changgiparangko nikangna man·aha, jekai Derek O’Brien aro Barry O’Brien-mang ong·aha, uamang ia susagrikanio niksenggiparang ong·aha. Indiba re·anggipa chasonggnio ia dakarikanio tang·onroroaniko nikna man·aha. Quriosity-ni gita chinga, quaizzing-o gisik nangatna nisano donaha, jekon chinga gari dake jakale mikrakatanirang aro skie ra·anio re·mikkanganiko an·senge ra·chakani ong·aha,” ine ua aganaha.
Arpit Nayak, jean sakgipingipa co-founder ong·a, ua quazzing event namen gamchatgipa ong·a ine aganaha.
“Chingni ia quizz-rang sakantinan ong·a, daka rikarango ma·sibatgiparangnasan ong·ja, chingni miksonganira ‘sakantian, maibani gimin ma·sie ra·ani ong·a, ia quizz-ko sakantian an·seng nikaha, ine anga chanchiaha. Chinga iako an·sengani gitasa ong·ataha,” ine ua aganaha.
Ia event-o Government of Meghalaya-ni Secretary Cyril V. Diengdoh mongsonggipa sokgipa ong·aha, jean Shillong Quizzing society-ko joltangni daka rikanirangko tang·chatpilanina demittelaha.
“Shillong re·anggipa somoirango bang·a quizzer-rangko nikangna man·aha. Shillong Quizzing Society-ni ia quizzing ba sing·anirango ong·atanira u·iate ma·siate on·ani aro ka·sagrike janggi tanganiko ra·bani ong·a. Uamangni jinma manderangni dolko indake sing·aniko ong·atanichi apsan rimbani gimin demittelaha,” ine ua agandapaha.
Student union-ni president aganprakanio, gipin a·dokrangoni napdrabae Meghalaya-ko ong·siatna ka·mikkenataniko champengna gita ILP-ko a·dokko ra·gatchina dabiaha. Ua jegalanio dingtang dingtang district-ni KSU memborrang re·bae bak ra·angaha.