TURA: Re·anggipa Sonibar salo, West Garo Hills a·jao donggipa Chikasingre songni Rural Haat-ko NABARD-ni Deputy General Manager Arun Kumar-ni jakchi nokdonggae on·angaha.
Ia Rural Haat-ko nokdonggaanio, West Garo Hills NABARD-ni DDM Kitmiller Sangma, BAKDIL-ni Director Rev Fr Cyril Sangma, BAKDIL-o kam ka·enggipa manderang, mondolini membor-rang aro songni manderangba dongpae bak ra·angtokaha.
Ia tom·anio NABARD-ni DGM Arun Kumar, jinmana aganprakangengon, ia Rural Haat-ko jako ra·e rikahani gimin BAKDIL-ko aro ia Rural Haat-ko rikna gita a·ako on·e bakrimaniko on·ahani gimin songni Nokma baksana songni manderangkoba mittelpilangaha.
Ia Rural Haat-ko kulianichi songni manderang da·ode chel·a biaprangona re·angna nanggijan, an·tangtangni game ge·e man·gipa bosturangko ia biapo palna sim·na man·gnok ineba Kumar aganaha.
Ia Rural Haat-ko kulianichi ia jolrango donggipa sak 6000-na baten manderang namgniko man·gnok ine janapatengon, ia Rural Haat-ko nirok sandina aro chalaidilna gita committee-ko songchina songni manderangko didiangaha.
