TURA: Namroro silroroani aro tom·tomaniko ra·bana gitade a·songo songdongenggipa manderangni ku·cholsa ong·e kam ka·aniko aro pilakni on·gilanikon nanga ine Budbar salo, National People’s Party (NPP)-ni candidate Agatha K Sangma, Tura Parliamentary Constituency-ni ning·o donggipa South Garo Hills a·jani Chokpot songo NPP-ni block level tom·aniko ong·atanio aganaha.
Budbar salo mikkarang wagenchimoba bang·bea manderangni ia tom·aniona re·bae bakko ra·eahani gimin ua Chokpot Assembly constituency-ni manderangkoba mittelpilangaha.
Namroro silroroaniko ra·bana gitade, ku·cholsan ong·e kam ka·aniko nanga ine janapatengon, Chokpot jolrango ka·sinsin namroro silroroaniko nikna man·baengahani gimin NPP-ni candidate aro Tura-ni MP, Chokpot-ni MLA aro Meghalaya sorkarini dingtang dingtang minister-rangkoba mittelpilangaha.
Tura parliamentary constituency-ni ning·o namroro silroroaniko ra·bakuna gita ia election-ara una namen mongsonggipa election ong·enga ineba Sangma aganaha.
Parliament-o Tribal dilgiparangni dongpaaniko namen nangchongmota ine janapatskaengon, ia Lok Sabha election-o an·tangtangni vote-rangko name chanchichengesa on·china NPP-ni candidate aganaha.
Mande sakantini vote-an namen gamchatbegipa ong·a ineba ua, election-ni somoirango mikkarang wagenchimoba dilgipako seokanio bak ra·china gita Chokpot jolni manderangko didiangaha.
Chokpot jolni manderangna dangdike on·angkuna aro namroro silroroaniko ra·bae on·angkuna gitaba Tura-ni MP ku·rachakaniko on·angaha.
Ia tom·bimonganiko ong·atanio NPP-ni state working president Marcuise N Marak, South Garo Hills NPP-ni district president Satto R Marak, Chokpot-ni MLA Sengchim Sangma aro dingtang dingtang dilgiparangba bak ra·angtokaha.
Namroro silroroaniko ra·banade ku·cholsan ong·e kam ka·aniko nanga: Agatha
Date:
Share post:
