TURA: West Garo Hills a·jani Nidanpur jolo Jal Jeevan Mission-ni scheme minggniko chu·sokatanio meligrikja ine Tikrikilla-ni saksa Luchina Marak minggipa mande, West Garo Hills a·jani Deputy Commissioner Jagdish Chelani aro PHE (Tura North Division)-ni Executive Engineer-na seachi badi ka·doangaha.
Marak-ni sedoatgipa chittio parakatani gitade, ia scheme minggniara Demdema C&RD Block-ni ning·o donggipa Nama Burijhar aro Patharkata songni water supply scheme-rang ong·achim.
Patharkata scheme-ni chu·gimik korosara gong kror 7.75 ong·achim aro Pabomari-Nama Burijhar project-ni korosara gong kror 5.51 ong·skaachim.
Ia project-rangni bidingo RTI ka·e man·ani ja·man ua ia project-rangni gimin DC aro PHE official-na badi ka·doangaha.
JJM dashboard-o mesokani gitade Patharkata JJM scheme-ni ning·o te 551 nokdangrangko man·gope da·o komibeoba te 500 nokdangrangna chi pipe-rangko chate on·manaha ine janapahachim aro Nama Burijhar JJM scheme-ni ning·o te 355 nokdangrangna chi pipe-rangko chate on·manaha ine janapskaahachim.
Indake ong·engon, uni RTI-o sing·sandianirangna aganchakaniko man·soani ja·man ua song damgniona re·ange nion, dashboard-o janapaming ua songo ong·chongmotamingde namen dingtanggrika ine Marak parakataha.
“Ia scheme minggnion togianirangko anga nikna man·aha maina Patharkata-o nokdang donggipa gimik te 260-san ong·aia aro uamangoni darangba chirangko man·tokkuja. Patharkata West-ode nokdang ge·saba chi pipe-rangkon man·srangkuja. Nama Burijhar songoba nokdang te 60-mangsan dongaia indiba dashboard-ode te 355 nokdangrang donga ine janapskaaha. Ia pilakan togigipa kamrangsan ong·aia,” ine Luchina Marak parakataha.
Nama Burijhar songoba nokdang ge·antian chi pipe-rangko man·kuja indide baoniko uamang nokdang te 355-na chi pipe-rangko chate on·aha ine janapskaaha ineba Marak sing·doataha.
Iani bidingo inquiry-ko dakenba ia kamko ka·gipa manderangni kosako rakgipa ja·kurangko de·chinaba Marak, DC aro PHE official-ko didiataha.