SHILLONG: Shillong parliamentary constituency-o National People’s Party (NPP)-ni candidate Ampareen Lyngdoh-na Trinamool Congress (TMC) chakengani gimin Congress dolan chepiltaigen ine MPCC-ni president aro Congress candidate Vincent H Pala a·kangatskaaha.
“TMC-ni NPP-na chakpaaniko on·aniara Congress-nasa namgni ong·skaenga aro Shillong seat-ko chinga chepiltaigen,” ine ua aganaha.
Tura Lok Sabha constituency-o TMC aro NPP dolgnini gisepo susagrikengon, Shillong-ode ia dolrang bakrimskaengani gimin manderang, ia dolgnini ‘songgigrikaniko’ nikna man·gnok ineba Pala aganaha.
“TMC-ni dilgiparang, an·tangtangni party worker-rang baksa BJP-o napna siengaha aro iako darangan ma·sitokaha,” ine MPCC-ni president aganaha.
Pala-ni aganani gitade, Congress dolko bilakatpiltaina gita uamang a·dokni Lok Sabha seat damgnion doltangari susana tik ka·aha.
“Ia seat damgnion chingna cholrang namenga aro Garo Hills-o chingni candidate-na cholrang nambatenga. Garo Hills-o BJP, NPP aro TMC-ni bang·a dilgiparangan Congress-o naptokengaha,” ine ua aganaha.
Congress aro TMC dolgnian INDIA bloc-o apsan bakrimenggipa dolrang ong·achim indiba Meghalaya a·dokode dolgnini gisepo songgigrikani gri Tura Lok Sabha constituency-o doltangari susagriktokengachim.
Shillong Lok Sabha seat-o TMC, candidate-ko susaatjahani gimin TMC Nongthymmai block-ni gitade NPP-ni candidate Ampareen Lyngdoh-na chakpaaniko on·skana tik ka·angahachim.
Indake ong·engon, ia chang Tura Lok Sabha seat-ko Congress chetelgen ine MPCC-ni working president Deborah Marak parakatskaaha.
Tura constituency-o Congress-ni candidate Saleng A Sangma-na chakgiparang bang·engani gimin ia changode NPP-ko Congress chetelgen ine Marak, an·tangni ka·dongchakenganiko parakataha.
PA Sangma sagini somoirangonin Tura Lok Sabha seat-ko uni nokdangni manderangna agre gipin dolrangoni chegipa dongkujaengachim ine nikna man·a.