SHILLONG: Meghalaya a·dokni Lok Sabha seat damgnio susagija National People’s Party (NPP)-na chakskana gita ma·mongo BJP-ko dilgiparang tik ka·ahani gimin a·doko BJP-na kam ka·enggipa bang·bata manderangan BJP-ni state president Rikman G Momin-ko matnangtokskaaha.
Meghalaya a·doko BJP, Shillong aro Tura parliamentary constituency damgnion susana gita ma·mongni dilgiparango bi·atahachim indiba ia seat damgniara BJP-ni bilgrigipa seat-rangsa ong·a ine ma·mongni dilgiparang, ia seat damgnio susagija NPP-na chakskana tik ka·angahachim.
Ma·mongni dilgiparang, a·dokni seat damgnio susajana parakatani ja·man Shillong-o BJP-na kam ka·enggiparang Sonibar salo tom·aniko ong·atangaha aro Garo Hills-oba BJP-ko dilenggiparang, Robibar salo tom·aniko ong·atangenba, ma·mongo BJP-ko dilenggiparangni tik ka·anina suk ong·gijaniko parakangtokaha.
A·dokni Lok Sabha seat damgnio susana gita ma·mongni dilgiparangko didijahani gimin a·dokni mitam BJP dilgiparang, state president Rikman Momin-ko kam watchinaba dabitokaha.
Koborko on·ani gitade, Shillong-o tom·aniko ong·atani ja·man BJP-ni mitam dilgiparang, ma·mongni dilgiparangko grongenba, a·dokni seat damgnio susaani bidingo chanchitaipilchina mol·molna tik ka·ahachim indiba tom·ani adita minute-rangni gisepon, state president aro gipin dilgiparang, a·dokni chief minister aro NPP-ni national president-ona dariange, a·doko NPP-na chakenganiko parakeskaaha.
“Khasi aro Jaintia Hills-ode BJP-ni worker-rangko ka·sinatna man·aigen indiba Garo Hills-ode NPP aro BJP-ni worker-rang meligriktokjani gimin suk ong·battokjaenga,” ine BJP-oni kobor on·timgipa parakataha.
BJP-ni mitam worker-rangni parakatani gitade, Delhi-oni kobor sokbana skangan a·doko NPP aro BJP-ni dilgiparang video conference gita tom·aniko ong·atahachim aro ia tom·anion BJP-ni dilgiparang, NPP-na chakpaaniko on·gen ineba tik ka·ahachim.
Uni ja·man, Tura-o BJP-ko dilenggiparang, March jani bon·angachibara tom·aniko ong·atenba, uamangni nangnikenggiparangni bidingo talataniko on·china party president-ko didiataha.
Indake ong·engon, a·doko BJP-ni mitam dilgiparang, state president Rikman Momin-ni kamna suk ong·gijaniko parakattokaha aro kamtangko jako ra·chengaoni jadokni ja·manba da·onan state executive meeting-koba ong·atkujaenga ine matnangattokaha.
Robibar salosan, Tura-ni MDC aro BJP-ni state vice president Bernard N Marak-de ia Lok Sabha election-o susajawaha ine parakatskaaha.