SHILLONG: Sombar salo, Meghalaya a·dokni Chief Minister aro NPP-ni national president Conrad K Sangma, Nagaland a·dokona re·angenba Chief Minister Neiphiu Rio-ko grongeaha aro Nagaland a·dokni Kohima Lok Sabha constituency-o National Democratic Progressive Party (NDPP)-ni candidate Chumben Murry-na chakpaaniko on·eaha.
Nagaland CM-ko grongena skang ua, Nagaland a·dokni NPP executive committee baksa tom·enba, ia Lok Sabha election-o susagija NDPP-ni candidate-na chakpaaniko on·skana chanchirimdilangaha.
Ia Lok Sabha election-o BJP-chi dilenggipa National Democratic Alliance (NDA)-o bakrimenggipa salgro salaram jolni dingtang dingtang political dolrang, a·dok ge·antion seat-rangko sualgrike susaengachim ine nikna man·a.
NPP-ni national president aro a·dokni Chief Minister Conrad Sangma-ni parakatani gitade, Nagaland a·doko NPP-ni state committee baksa ua tom·e chanchirimangenba, Kohima Parliamentary seat-o susagija, NDA-o apsan bakrimenggipa NDPP-na chakpaaniko on·skana tik ka·angaha.
NDA-o bakrimenggipa dolrang, Meghalaya a·doko NPP-na, Arunachal Pradesh-o BJP-na, outer Manipur-o NPF-na Nagaland a·doko NDPP-na chakpaaniko on·grikenga ineba ua aganaha.
NDA-ko dilenggipa dol ong·e BJP-ba Nagaland a·dokni Kohima Parliamentary seat aro Meghalaya a·dokni Shillong aro Tura Parliamentary seat-rango susagija, ia seat-rango Nagaland a·dokni NDPP aro NPP-na chakpaanirangko on·skaengachim ine nikna man·a.
