TURA: North Garo Hills a·jani Bajengdoba primary health centre (PHC)-o doctor-rang chu·ongjae sanna bananirangko on·anio neng·nikanirangko chagrongna nangenga ine A·chik Holistic Awakening Movement (AHAM) Bajengdoba regional unit parakatenba, ia PHC-na doctor-rangko on·dapatchina sorkariko didiataha.
AHAM Bajengdoba regional unit-ni president Kollingwat Sangma-ni parakatani gitade, Bajengdoba PHC-ni ning·o komibeoba sak 36,000-mangni manderang sanna bananirangko ra·na nangenga aro batanggimin somoirangode ia PHC-na doctor sakgniko donahachim. Indake ong·genchimoba da·o Bajengdoba PHC-o doctor saksamangmangsan sagiparangko nirokna aro sanna banna gita nangengani a·sel PHC-o kam ka·giparangsan ong·aigija sanna bananirangko ra·enggipa manderangba neng·nikanirangko chagrongna nangtokenga ine AHAM Bajengdoba regional unit-ni president parakataha.
“Iani bidingo chinga North Garo Hills a·jani District Medical & Health Officer-ko gronge agangrikon, doctor-rangko songe on·anide uamangni bilo ong·ja aro North Garo Hills a·jao appoint ka·a man·gipa mitam doctor-rangba West Garo Hills a·jaona transfer ka·ako man·e pilakni gitan neng·nikanirangko chagrongna nangtokenga ine ma·sina man·aha. Indake ong·genchimoba, Bajengdoba PHC-o doctor chu·ongjae kam ka·giparangsan ong·aigija sagipa ding·gipa manderangba neng·nikanirangko chagrongna nangtokengani gimin ta·raken Bajengdoba PHC-na doctor-ko on·dapatchina chinga sorkariko didiatenga,” ine Sangma parakataha.
Iani bidingo AHAM Bajengdoba regional unit-ni dilgiparang, North Garo Hills a·jani Deputy Commissioner-naba memorandum-ko on·angaha.
