SHILLONG: Re·baenggipa April-ni 19 tariko ong·atna sienggipa Lok Sabha election-ko tom·tomao ong·atna man·na gita ma·mongni dol 40 paramilitary force ba sipai dolrangko Meghalaya a·dokona rimbagen ine Sombar salo, a·dokni Chief Electoral Officer (CEO) BDR Tiwari parakataha.
Iani bidingo kobor ra·timgiparangna u·iatengon, Meghalaya a·dokna dol 40 central armed police force (CAPF)-rangko ma·mong sorkari, Lok Sabha election-na on·atenga ine CEO parakataha.
CEO-ni parakatani gitade, ia dol 40 CAPF-oni dolbongakode a·dokni dingtang dingtang biaprango donatmanaha aro gipin dolrangkoba nangani kri a·dokni dingtang dingtang biaprango donatgen.
Meghalaya a·doko Lok Sabha election-ko tom·tome aro nama bewalo ong·atna man·na gita Election Commission, nanga gita ja·kurangko de·somanaha ineba Tiwari aganaha.
“Election-na skang, a·dok damgnini simarango ong·enggipa obostarangni giminba chanchisomanaha aro Election Commission-ni ge·etani gita chinga Assam a·dok baksa iani bidingo agangrikenga,” ine CEO aganaha.
Model Code of Conduct (MCC) ba election-na dongimin niamrangko pe·ani bidingo da·o dipet uamang minggni badi ka·anirangko man·soaha ineba Tiwari parakataha.
Ia badi ka·anirangko Election department, C-Vigil app gita man·soaha ine janapatengon, iani bidingo uamang nanga gita ja·kurangko de·manaha ine CEO parakataha.
