Shillong: Adita salrangna skango Ichamati-o sakgni manderangko so·otani bidingo doltangni membor sakgniko police-ni rim·anina KSU South Khasi Hills, police-ni kosako sing·doaha.
Police, mija Sombar walo East Khasi Hills Sohra-ni bilsi 26 ong·gipa Mesadapbor Skhembil aro apsan bilsi ong·gipa East Khasi Hills, Mawlong Sirdarship, Sohra-ni Shanborlang Shati mangko rim·ahchim.
Unomitingo, police maina waljatchio uamangni nokona re·ange uamangko rim·ena nanga ine KSU South Khasi Hills president, Ribok Diengdoh police-ni kosako sing·doaha.
Police-ni uamangni nokona waljatchio re·ange rim·eaniara, uamangkoara bobil dolni manderang gita nikama ineba ua sing·doaha.
Indake ong·engon, “HNLC-ni gitcham membor, Cheristerfield Thangkhiew-ko daka gita police dakna nangjawa” ineba KSU South Khasi Hills president aganaha.
Uni aganani gitade, police uamangko Sohra police station-ona oakamateba sing·rokna man·achim.
Jeba mandeni aganachide maming sakki-sabut gride police ramramari uamangko rim·na nangja ineba Diengdoh aganaha.
Unomitingo skango KSU-ni gitcham membor, Lurshai Hynniewta-ko so·otgipakode police da·alonaba rim·a man·kuja indiba da·o mande sakgniko so·otgipgipako police bakan KSU memborrang ine parakatna man·aia ineba KSU South Khasi Hills president aganaha.
