Inquiry-ko dakchina Congress dabia
SHILLONG: Arunachal Pradesh a·doko Meghalaya a·dokni Chief Minister aro National People’s Party (NPP)-ni national president Conrad K Sangma-ko salangenggipa convoy ba dolni ja·man re·angenggipa gari bolsaoniko gong kror 1-na batpile tangkarangko man·ani bidingo Congress dol, Election Commission of India (ECI)-na badi ka·dona gita tik ka·angaha aro iani bidingo ning·tue sandirokchina gitaba dabiangaha.
Iani bidingo Meghalaya Pradesh Youth Congress (MPYC)-ni vice president Banphiralang Basaiawmoit, kobor ra·timgipa manderang baksa agangrikengon, ia garioniko kror 1 batpile tangkarangko man·ahani gimin Congress dol, ECI-na bilaken badi ka·doangna gita tik ka·aha ine parakataha.
Ia tangkarangko Bristibar attamchibara, AS-01ET 5252 Fortuner garioniko man·ahachim aro Arunachal police-rangni u·iatani gitade, ia gariara CM-ko dilangenggipa dolni bak ong·jachim indiba uamangni ki·sango re·angenggipa garisa ong·achim.
Indake ong·genchimoba ia gari aro tangkarangara, Badri Rai & Constructions Ltd-ni Executive Director Harshvardhan Singh-ni ong·achim aro ia company-ara NPP-chi dilenggipa MDA sorkarini dingtang dingtang dal·dalgipa project-rang, jekai Mawdiangdiang-o rikenggipa Assembly building, re·anggipa bilsio Tura-o be·prakanggipa PA Sangma Stadium, Polo-ni commercial complex project aro uandakgipa kamrangko ka·gipa company-sa ong·ani gimin manderangni gisepo chanchichipanirangba ong·katskaahachim.
Indake ong·engon, iani bidingo name chanchie nichina gitaba MPYC, a·dokni manderangko mol·molataha.
“Tangka man·gipa gariara uamangni doloni ong·ja ine NPP jegalaha indiba name chanchie nigenchimode an·ching kakketko ma·sina man·aigen. Ia Badri Rai Construction company-na NPP-chi dilenggipa MDA sorkarian dingtang dingtang kamrangko ka·na on·gipa ong·a,” ine Basaiawmoit parakataha.
Model Code of Conduct (MCC)-ni niamo gong 50,000-na bate tangkarangko ra·bitna on·jachim ine janapatengon, ia niamko ja·rikjani gimin ua NPP-ni dilgiparangkoba matnangataha.
“Ian tangka paisa jakkalsretani dam ong·a aro ia tangkarangkon election-ni kamrangna jakkalgen ba jakkalenga,” ine Basaiawmoit aganaha.
Ia a·selko dongnujachina aro name sandirokchina gitaba MPYC, sorkari official-rangko didiataha.
“Iani bidingo name sandirokchina chinga nangnikenga aro chinga bebera·a ia kamko Election Commission jrip nie dongjawa. Kakketko chingna nanga indiba ia manderangna ia election-o manderangan aganchakaniko on·gen. Manderang da·ode gokarang ong·jaha,” ine MPYC-ni vice president aganaha.