SHILLONG: Budbar salo, East Khasi Hills a·jani Mawlai Mawroh-o nok rikani kamrangko ka·enggipa mande sakgittamko ma·sina man·gijagipa manderang chadrapeaha aro ia manderangni jako dokako man·e ia mande sakgittamoni saksade siangna gita nangaha.
Sianggipa mandeara Nongmynsong-oni bilsi 52 ong·gipa Arjun Ray ong·achim ine ma·sina man·aha.
Ia a·selni bidingo talataniko on·angengon, Budbar salni 11:15 bajimango ma·sina man·gijagipa dolsa manderang, Mawlai Mawroh-o nok rikenggipa biapona re·ange, kam ka·enggipa mande sakgittamko chadrapeaha aro ia manderangni jako dokako man·e uamangoni saksade bilongbee saknaanirangko man·aha ine East Khasi Hills a·jani SP Rituraj Ravi parakataha.
Bilongbee saknaaniko man·ahani gimin ia mandeko bakan Shillong songjinmani NEIGRIHMS-ona sanna gita ra·angahachim indiba ua hospital-on siangaha ineba SP parakataha.
SP-ni u·iatani gitade, ia manderangni chadrapanio sakgipin mandeba saknaanirangko man·aha aro ukoba NEIGRIHMS-o done sanna bananiko on·enga.
“Chinga ia a·selni bidingo mokordomako segataha aro dos dakgipa manderangko sandina a·bachengataha,” ine Ravi parakataha.
Adita salrangna skangsan, Citizenship Amendment Act (CAA)-ko jegale dingtang dingtang dolrangni Ichamati-o jinma re·jomaniko ong·atani ja·man gipin jat mande sakgni chadrapako man·e siangahachim.