TURA: BJP aro NPP apsan dolan ong·a ine Robibar salo, Tura Lok Sabha constituency-ni Congress candidate Saleng A Sangma matnangatenba, India a·songo Congress dolmangmangsan pilak jatrangni gisepo tom·tomani aro meli-nangrimaniko ra·bana man·gipa political dol ong·a ine parakataha.
Tura jillani biap damsao election campaign ka·engmiting somoio ua ia kattarangko aganaha.
BJP aro NPP dolrang apsan dolan ong·a ine matnangatengon, a·songo songdongenggipa Dalit-rang, Adivasirang aro Kristianrangko maikai BJP aro RSS dolrang, dokkol ka·rongengachim, uarangni bidingo manderangna gisik ra·atpilaniko on·angaha. BJP-ni iandakgipa miksonganirang dongani giminan JDU, Samajwadi Party, Shiv Sena aro uandakgipa gipin Hindu political dolrangba BJP-ko namniktokja ineba Sangma aganaha.
“BJP-ni kamrango kusi ong·jaen party-tangni minister-rangba kamtangtangko wate kattokenga. Da·al salni bakoba BJP MP aro gipin minister-rang kamtangtangko wataha,” ine Congress candidate aganaha.
A·songo ra·gatna sienggipa Citizenship Amendment Act (CAA)-ni bidingo janapangengon, ia CAA-ni niamrang Shillong aro Tura-oba nangchakeani dongaigen ine Sangma parakataha.
“Shillong aro Tura jilla damgnian joltangtangni headquarter-rang ong·a aro ia pilak a·jarangnan nangchongmotgipa kamrangko ia biap damgnioni a·bachengrongani gimin ian gipin biaprangonaba gipangani cholrang dongaia,” ine Sangma aganaha.
Congress candidate-ni aganani gitade, CAA-ni niamrang Sixth Scheduled a·jarangode nangchakeani dongjawa ine agananiara pa·sikani kattarangsan ong·aia aro mikkangchi ia CAA-ni nangchakeaniko je biaponiba nikna man·ani cholrang dongaia.
Meghalaya a·doko Inner Line Permit (ILP) donggenchimode, a·doko niam gri napsrukanirangko bewalan chel·chakna man·genchim ineba ua aganaha.
Ia tom·anio, Balsrigittimni chadamberang, Congress candidate-na adita tangkarangko on·gilatjolaha.
