TURA: Nangana bate chini salgipa truck gari bolgni apsan somoion re·ahani a·sel Tura-oni Baghmara-ona dakanggipa ramani mongsonggipa dolong damsa be·gruna gita nangaha.
Koborko on·ani gitade ia dolongara, West Garo Hills aro South Garo Hills a·jako nangdimatgipa Thibapara songo ong·achim aro ian Dalu jolo donggipa Bagla chiringko kabatgipa dolong ong·e, South Garo Hills a·jani headquarter Baghmara aro gipin biaprangona re·ani mongsonggipa chol ong·achim.
Mongolbar pringo, ia dolong gita chini salgipa truck gari bolgni, apsan somoion re·angengachim aro ia chini gape salgipa truck garirangni jreaniko amchakjae ia dolong be·gruna nangaha ine jolo songdongenggipa manderang parakataha.
Ia rama gita chini salgipa truck garirangni re·rurana a·bachengahani giminba mitam manderang sing·doattokskaaha.
India a·songni chinirangko Bangladesh a·songona niam gri badingatna gita batanggimin somoirangonin NH-62 rama gita aro Rongjeng jolrang gitasa Assam-oniko South Garo Hills a·jaona salangrongengachim ine nikna man·a.
Iandake niam gri India a·songni chinirangko Bangladesh a·songona badingatengani gimin dingtang dingtang dolrang, changni chang sorkarina aro district administration-rangna badi ka·doangtokaha aro uandaken batanggimin somoirango BSF aro police-rang, South Garo Hills a·jani simrango bang·en chinirangko rim·na man·ahachim.
NH-62 rama gita South Garo Hills a·jaona chini salangengako sipai dolrangni nirikkianirang da·o bilakbatrorobaengani giminsa mitam dolrang da·o chinirangko Tura rama gita South Garo Hills a·jaona salna a·bachengskaengahachimkon ine ia dolong be·gruani ja·man, bang·a manderangan chanchichipenganiko parakataha.
Chini salgipa truck garirangni a·sel Tura-Baghmara re·gipa dolong ge·sa be·a
Date:
Share post:
