TURA: Mongolbar salo, chini salangenggipa truck bolgni apsan somoion re·angani a·sel Joshipara jolo mongsonggipa dolong be·na nangahani gimin Bangladesh a·songona niam gri chini badingenggipani bidingo East Garo Hills a·jani saksa Nilberth Ch Marak, Chief Election Commissioner (CEC)-na badi ka·doangaha.
Bangladesh a·songona niam gri chini badingatenggipani bidingo changni chang badi ka·ani ja·manoba maming ja·kurangko de·jahani a·selsa ia dolong be·gruna gita nangaha ine Marak, North Garo Hills, West Garo Hills aro South Garo Hills a·jani deputy commissioner (DC)-rang aro superintendent of police (SP)-rangni kosako Chief Election Commissioner-na badi ka·doangaha.
Mongolbar salo be·gipa dolongara, West Garo Hills aro South Garo Hills a·jako nangdimatgipa Thibapara songo ong·achim aro ian Dalu jolo donggipa Bagla chiringko kabatgipa dolong ong·e, South Garo Hills a·jani headquarter Baghmara aro gipin biaprangona re·ani mongsonggipa chol ong·achim ine nikna man·a.
Iana skangba, Nilberth Marak, North Garo Hills a·jani SP Bruno A Sangma-ni kosako badi ka·ahani gimin uni biapo Abraham T Sangma-ko North Garo Hills a·jani SP dake donatskaahachim.
“Angni mol·molaniko knachakenba ta·raken uni biapo gital SP Abraham Sangma-ko donatskaaha. Indake ong·genchimoba, nangana bate chini salruraenggipa garirangko nirok sandianirang dongjani a·selo chini salgipa truck garirang jakgitelen re·rurana man·aiaha aro iani a·selan Joshipara songni mongsonggipa dolong be·gruna nangaha,” ine CEC-na badi ka·doatgipa chittio Marak parakataha.
Ia dolong be·ahani a·sel da·o jolo songdongenggipa manderangsan ong·aigija, Baghmara-o kam ka·enggiparang aro da·o Lok Sabha election-o dingtang dingtang polling station-rango kamko ka·na donatako man·gipa polling official-rangba re·a doanio neng·nikanirangko chagrongna nangtokengaha ine janapatengon, ia a·ja damgittamni DC aro SP-rangni kosako rakgipa ja·kurangko de·china Marak didiataha.