SHILLONG: Budbar salo, East Garo Hills a·jani Rongmil jolo, Assam-ni mande sakgittamko so·e gope galako police-rangni man·ani ja·man Meghalaya Human Rights Commission (MHRC), iani bidingo a·dok sorkarioniko report bi·ataha.
Iani bidingo u·iataniko on·atengon, jasani gisepon mai ja·kurangko de·ahachim, uni bidingo chu·gimik report-ko on·atchina gita a·dokni Director General of Police (DGP)-na ge·etaniko on·ataha ine MHRC parakataha.
Budbar salo, East Garo Hills a·jani Rongmil jolo, ma·sina man·pilgija wa·al kame gopramo gopgimin mande sakgittamni manggisirangko police-rang man·ahachim.
East Garo Hills a·jani SP SA Rynjah-ni u·iatani gitade, bilsi 35 ong·gipa Jamor Ali, uni driver Noor Ahmed aro bilsi 25 ong·gipa Zahidul Islam, re·anggipa April-ni 25 tarikon, Meghalaya a·doko kam nangchongmota dongani gimin re·baenga ine noko aganbaahachim. April-ni 16 tarik pring 6:30 bajimango, uamang Garo Hills-ni buring dakgipa biapo cha ringenga ine Jamor Ali, nokni manderangna phone ka·e aganataha indiba uni ja·mande uamangni phone switched off ong·aiaha aro uamangna uamangni nokni manderang phone ka·oba man·taijahachim.
Uamangni gimaenggipa gariko, Rongjeng police station-ni ning·o donggipa Rogu Alda songona dakanggipa ramani buringo, kamgiminkosa ja·mano police-rang man·ahachim. Gari man·gipa biap sambarangoniko police-rang am·sandiangkuon, gopdaldal gopramkoba nikeaha aro ia gopramrangko cho·e nion, ia mande sakgittamni kamgimin manggisirangko police-rang man·aha ine SP u·iataha.
Indake ong·engon, ia mande sakgittamoni saksa Zahidul Islam-de gari cha·uanina Dudhnoi aro Krishnai-o case dongkuengachim aro sakgipin Jamor Ali-ba matchu cha·uana Assam-ni Matia police station-o case dongkuengachim ine East Garo Hills SP parakataha.