TURA: East Garo Hills a·jani Rongmil songo Assam-ni mande sakgittamko so·ote galani ja·man Assam aro Meghalaya a·doko songdongenggipa manderangni gisepo adita ding·chaogrikanirangko social media-rango nikna man·engani gimin Robibar salo Assam-ni All Assam Minority Students Union (AAMSU)-ni dilgiparang, Garo Hills-ni AAYF, AIJIF, GSMC, AYWO, ADE, PJAC, AHAM, FAF, AYWS, Mothers Union aro GSU dolrang baksa Dudhnoi IB-o tom·e chanchirimangenba a·dok damgni aro jatgnini gisepo tom·tomaniko rakkiangna gita ku·rachakgrikangaha.
Ia a·selni bidingo social media gita tol·e watpripraenggipa koborrang aro video-rangko bebera·jachina aro uarangko gipinrangna watrikrikskajachina gitaba NGO-rang, a·dok damgnini manderangkon didiataha.
“Ia a·selni bidingo police-rang, dos dakgipa manderangko rim·na sandirokanirangko dakkuengani gimin chinga a·dok damgnini manderangkon maming so·sojengjeng ong·atani kamrangko ka·jachina mol·molenga maina tol·pinapgipa koborrang aro video-rangko watrikrikanichi obostarangko namjabatatna man·a,” ine Garo Hills-ni NGO-rang baksa tom·e chanchirimani ja·man AAMSU-ni president parakataha.
Manderangni janggiko so·ote galahani gimin an·tangni suk ong·gijaniko parakatengon, mande jegitaba namgijagipa ong·china darangba mandeni janggiko ra·na bil dongja ine AAMSU-ni president parakataha.
“So·ota man·gipa mande sakgittamni kosako Assam-o case-rang dongkuenga ine an·ching ma·sia indiba batanggimin somoirango uamang je kamko ka·genchimoba mandeni janggiko so·otaniara jegalaniko man·na kragipa kam ong·aia,” ine AAMSU-ni president parakataha.
Ia a·selko jatgnini gisepo so·sojengjeng ong·ataniona ra·bajachina a·dok damgnini manderangko didiatengon, “Rama champengatani ba jatgnini gisepo ding·chaogrikataniko ra·baaniara police-rangni dos dakgipa manderangko rim·na sandirokaniko champengata gitasan ong·aigija aro kakket bichalko ra·baanio ru·utbatatgen. Uni gimin kakket bichalko man·na gita hai an·ching ku·cholsan ong·e dongangkuna,” ine AAMSU-ni president parakataha.
Ia a·sel ong·anio dos donggipa manderangko ta·raken rim·china aro niamo pangchake rakgipa sastirangko on·china gitaba a·dok damgnini NGO-rang didiataha.