SHILLONG: Doltangni kosako social media-o kattarangko seahani gimin Voice of the People’s Party (VPP)-ni membor Avner Medon Pariat-ko VPP-ni dilgiparang ra·galataha.
Ra·galani chittiko Pariat-na Sonibar salo, VPP disciplinary committee-ni chairman Kara H Shen aro secretary Grossper Rynthathiang on·ataha.
“Ua saksa VPP state executive committee-ni membor ong·eba gipin dolna chake social media-o seahani gimin Pariat-ko party-oniko ra·galna tik ka·angaha,” ine VPP disciplinary committee-ni chairman parakataha.
Shen-ni parakatani gitade, Pariat-ni social media-o gipin dolna chake seatanichi VPP-ni bimangko ong·siatani gita ong·aha aro ian party-ko mangrakbatatna krenge kam ka·aniko nisigalani gitaba ong·ahachim.
“Uni gimin nang·ni dakgimin kamrangna chinga nang·ko ra·galana agrede maming gipin chol dongjaha,” ine VPP disciplinary committee-ni dilgiparang, Pariat-na watatgipa chittio parakataha.
VPP-oniko ra·gala man·gipa Avner Medon Pariat, re·anggipa bilsini Assembly election-o East Shillong constituency-oni susaahachim ine nikna man·a.
Iani bidingo sing·sandiaton, ua an·tangan VPP-oni ong·katna miksonganirang dongachim aro April-ni 16 tarikon party-ni mitam dilgiparangna chittiko seatahachim ine Pariat parakatskaaha.