SHILLONG: Meghalaya a·dokni pilak biaprangon ia sal somoirango ding·ani batroroengani gimin skulo poraienggipa bi·sarang aro skigiparangni namgnina sorkari, dingtangmancha niamrangko donataha.
Iani bidingo u·iataniko on·atengon, ding·anirang batroroengani gimin da·o dipet skulrango kal·susaani ba uandake a·palni kamrangko ka·atjachina gita School Education & Literacy-ni Director Swapnil Tembe, pilak skulrangnan ge·etaniko on·ataha.
Skulo poraienggipa chatro chatrirang aro kam ka·enggipa manderangni namgnina skulni pilak biaprangon chu·onga gita ringani chirangko donchina aro man·a dipet salakkimko tarie on·china Education official u·iataha.
Skulni somoio chatro chatrirangoni saoba, be·enni ran·anichi sagitikna nanggenchimode ta·raken sepangbatgipa hospital-rangona rimangchina gitaba Tembe u·iataha.
Skulo poraienggipa pilak chatro chatrirangkon chi bottle-rangko ra·bitchina aro chiko ringjringchina gitaba Education official didiataha.
Skulo chatro chatrirang sagitikan somoirangona pangnan ORS ba kakji bitchirangko tarie donchina gitaba sorkari u·iataha.
Salni 12:00 bajioni attamni 3:00 bajiona sal rakaona ong·katjachina aro ong·katengon pangnan tupi ba chatarangko ra·bitchina gitaba Tembe u·iataha.
Skulo ba a·palo ja·arara ong·katjachina gitaba sorkari, chatro chatrirangko didiataha.
Sukrobar salni 12:00 bajio Tura-o ding·ani 33 degree C, Shillong-o 28 degree C aro Nongpoh-o 33 degree Celsius ong·ahachim.